9 नवा नर्सिंग कॉलेज मन के भवन निर्माण ल मिलीस 78 करोड़ 15 लाख रुपिया के प्रशासकीय स्वीकृति
रायपुर, मुख्यमंत्री श्री विष्णुदेव साय के एक अऊ महत्वपूर्ण घोषणा ल राज्य सरकार ह मूर्त रूप दे देहे हे। राज्य बजट म सामिल 9 नवा नर्सिंग महाविद्यालय मन के भवन निर्माण काम खातिर 78 करोड़ 15 लाख रुपिया के प्रशासकीय स्वीकृति जारी कर दे गए हे। स्वास्थ्य मंत्री श्री श्याम बिहारी जायसवाल ह ए स्वीकृति खातिर मुख्यमंत्री श्री विष्णुदेव साय अऊ वित्त मंत्री श्री ओ.पी. चौधरी के आभार व्यक्त करे हे। उमन कहिन के ये निर्णय प्रदेश म नर्सिंग शिक्षा ल नवा दिशा देही अऊ स्वास्थ्य क्षेत्र म कुशल मानव संसाधन तियार करे म मदद करही।
हर एक नर्सिंग महाविद्यालय के भवन निर्माण खातिर 8 करोड़ 68 लाख रुपिया के राशि स्वीकृत करे गए हे। ये नवा नर्सिंग कॉलेज दंतेवाड़ा, बैकुंठपुर, बीजापुर, बलरामपुर, जशपुर, रायगढ़, धमतरी, जांजगीर-चांपा अऊ नवा रायपुर (अटल नगर) म स्थापित करे जाही। ए संस्थान मन के स्थापना ले प्रदेश के दूरस्थ अऊ जनजातीय अंचल के पढ़ईया लईका मन ल घलोक गुणवत्तापूर्ण नर्सिंग शिक्षा प्राप्त करे के अवसर मिलही, जेखर से स्थानीय युवा मन ल रोजगार के नवा दुवारी खुलही अऊ राज्य के स्वास्थ्य क्षेत्र म प्रशिक्षित मानव संसाधन के उपलब्धता अऊ सुदृढ़ होही।
“हमर उद्देश्य हे के प्रदेश के हर युवा ल गुणवत्तापूर्ण स्वास्थ्य शिक्षा मिलय अऊ हर जिला म आधुनिक स्वास्थ्य सेवा खातिर कुशल मानव संसाधन घलोक तैयार होवय। 9 नवा नर्सिंग कॉलेज मन के भवन निर्माण के स्वीकृति प्रदेश के स्वास्थ्य शिक्षा क्षेत्र म एक नवा अध्याय जोड़ही। ये पहल स्वास्थ्य व्यवस्था ल सशक्त बनाही, संगेच युवा मन खातिर रोजगार अऊ आत्मनिर्भरता के अवसर घलोक बढ़ाही।” -मुख्यमंत्री श्री विष्णुदेव साय
“मुख्यमंत्री श्री विष्णुदेव साय के दूरदर्शी अगुवई म राज्य सरकार ह स्वास्थ्य शिक्षा ल नवा दिशा देवइया ऐतिहासिक निर्णय लेहे हे। 9 नवा नर्सिंग कॉलेज मन के भवन निर्माण के स्वीकृति ले प्रदेश के युवा मन ल गुणवत्तापूर्ण नर्सिंग शिक्षा के संग रोजगार अऊ आत्मनिर्भरता के बेहतर अवसर प्राप्त होही। ये पहल छत्तीसगढ़ ल स्वास्थ्य सेवा अऊ मानव संसाधन विकास के क्षेत्र म नवा आयाम स्थापित करे म मदद करही।” – स्वास्थ्य मंत्री श्री श्याम बिहारी जायसवाल
“मुख्यमंत्री श्री विष्णुदेव साय के अगुवई म राज्य सरकार शिक्षा अऊ स्वास्थ्य जइसे बुनियादी क्षेत्र मन ल प्राथमिकता देवत हे। 9 नवा नर्सिंग कॉलेज मन के भवन निर्माण खातिर 78 करोड़ 15 लाख रुपिया के स्वीकृति ए बात के चिनहारी हे के सरकार प्रदेश के युवा मन खातिर अवसर सृजन अऊ सेवा क्षेत्र ल सशक्त बनाए खातिर बाना उंचाए हे।” – वित्त मंत्री श्री ओ पी चौधरी
