जशपुर जिला म शिक्षा के विस्तार के दिशा म एक अऊ महत्वपूर्ण कदम
जशपुर, मुख्यमंत्री श्री विष्णुदेव साय ह मनोरा विकासखंड के शासकीय कॉलेज भवन के निर्माण काम बर 4 करोड़ 61 लाख 25 हजार रुपिया के प्रशासकीय स्वीकृति देहे हे। ये स्वीकृति मुख्यमंत्री ह अपन जशपुर प्रवास के समय करे गए घोषणा के मुताबिक देहे हे, जेन म राज्य सरकार कोति ले तत्परता से अमल करे जात हे।
मुख्यमंत्री ह स्पष्ट करे हे के जशपुर जिला के विकास काम मन म कोनो प्रकार के बाधा नइ आन दे जाय। उमन कहिन के शिक्षा, स्वास्थ्य, अधोसंरचना अऊ सड़क-पुल निर्माण ले जुड़े काम मन बर सरलग स्वीकृति देहे जात हे, ताकि विकास योजना मन तेज़ी से धरातल म उतर सकंय। मुख्यमंत्री ह ये घलोक कहिन के राज्य सरकार के प्रयास हे के दूरस्थ अंचल मन के लइका मन ल घलोक उच्च शिक्षा के बेहतर सुविधा ऊंखर घर के तीरेच म मिल सकय। इही उद्देश्य ले मनोरा म कॉलेज भवन के निर्माण कराए जात हे। एखर संगेच जिला म पर्यटन ल बढ़ावा देहे अऊ स्वास्थ्य सेवा के विस्तार के दिशा म घलोक ठोस प्रयास करे जात हे।
मनोरा म कॉलेज भवन निर्माण के स्वीकृति ले क्षेत्र के पढ़ईया लईका मन ल पढ़ाई बर अब बाहिर नइ जाना परय अऊ ओ मन ल स्थानीय स्तर म गुणवत्तापूर्ण शिक्षा मिल सकही। स्थानीय जनप्रतिनिधि अऊ नागरिक मन ह मुख्यमंत्री के ए पहल बर उंखर आभार प्रकट करे हें।
मुख्यमंत्री के घोषणा म जल्दी अमल : मनोरा कॉलेज भवन निर्माण बर 4.61 करोड़ रुपिया के स्वीकृति
