नवा विधानसभा भवन के निर्माण लउहे पूरा होही: मुख्यमंत्री श्री भूपेश बघेल

रायपुर, 29 अगस्त 2020। छत्तीसगढ़ विधासभा भवन के नवा भवन के नवा रायपुर म शिलान्यास के बेरा म मुख्यमंत्री श्री भूपेश बघेल ह अपन उद्बोधन के शुरुआत छत्तीसगढ़ महतारी अऊ भारत माता के जयकारा ले करिन। उमन कहिन के नवा रायपुर अटल नगर आबाद होवय, एला लेके छत्तीसगढ़ सरकार चौतरफा उपाय करत हे। मंत्रिमंडल के सहयोगी मन अऊ अधिकारी-कर्मचारी मन बर घर बनाए के शुरुआत बीते साल ले हो गए हे। कोरोना संक्रमण के सेती काम म थोकन बिलंब होय हे। संसदीय सचिव मन ल नवा रायपुर म ही घर आबंटित करे गए हे। मुख्यसचिव नवा रायपुर म निवास करे लगे हें। उमन उम्मीद जताईन के अवइया बछर म इहां राज्यपाल, मंत्रीगण अऊ शासन-प्रशासन ले जुड़े सबो मनखे रहे लगहीं, इहां सुविधा बाढ़ही। ये नवा शहर ल बसाए के सबो अड़चन दूर हो जाही। मुख्यमंत्री श्री भूपेश बघेल ह कहिन के हमर ये उदीम रइही के विधानसभा के नवा भवन जल्दीच बनके तियार हो जाय अऊ हम सब छत्तीसगढ़ के पौने तीन करोड़ जनता अऊ छत्तीसगढ़ महतारी के सेवा बर इहां बइठन। मुख्यमंत्री श्री भूपेश बघेल ह विधानसभा भवन के शिलान्यास कार्यक्रम म सांसद श्रीमती सोनिया गांधी अऊ श्री राहुल गांधी के वर्चुअल उपस्थिति बर धन्यवाद ज्ञापित करिन।