जांजगीर-चांपा, महात्मा गांधी राष्ट्रीय ग्रामीण रोजगार गारंटी योजना (मनरेगा) ग्रामीण आजीविका सुदृढ़ करे म सरलग नवा मिसाल गढ़त हे। इही कड़ी म जांजगीर-चांपा जिला के नवागढ़ विकासखंड के ग्राम पंचायत दहिदा म कुआं निर्माण काम ह किसान रामनारायण के जीवन ल नवा दिशा देहे हे।
पहिली रामनारायण पानी के समस्या ले अड़बड़ परेशान रहिस। खेत मन म सिंचाई के सुविधा नइ होए ले फसल सूख जात रहिस अऊ परिवार ल पीए अउ घरेलू उपयोग खातिर घलोक पानी दूर-दराज ले लाना परत रहिस। खेती करना वोखर बर लगभग असंभव हो गए रहिस। अइसन कठिन हालत म मनरेगा योजना वोखर बर संजीवनी साबित होइस।
ग्राम सभा अऊ रोजगार सहायक ले जानकारी ले के रामनारायण ह कुआं खोदवाए के प्रस्ताव दीस, जेन ल ग्राम सभा ले स्वीकृत करवा के साल 2023-24 म 2.52 लाख रूपिया के लागत ले मंजूरी देहे गीस। ए काम ले 354 मानव दिवस के सृजन होइस। प्रारंभिक कठिनाइ —कठोर मिट्टी अऊ गहराई म चट्टान जइसे बाधा मन—के बावजूद पंचायत, तकनीकी दल अऊ मजदूर मन के सामूहिक प्रयास ले कुआं निर्माण काम सफलतापूर्वक पूरा होइस।
आज कुआं बने ले रामनारायण के खेत मन म हरियाली लहुट आए हे। सिंचाई के भरपूर सुविधा उपलब्ध होए ले फसल लहलहाए लगे हे, पशु मन खातिर पानी के स्थायी व्यवस्था हो गए हे अऊ परिवार के आय म बढ़ोतरी हो गए हे। एखर से वोखर जीवन स्तर म उल्लेखनीय सुधार आए हे। रामनारायण के कहना हे कि “पहिली खेती करना कठिन हो गए रहिन, फेर कुआं खोदवाए ले अब खेत मन म पानी के सुविधा उपलब्ध हे, संगेच घर अऊ पशु मन खातिर घलोक भरपूर पानी मिलत हे। आय बाढ़े ले परिवार के जीवन सुखमय हो गए हे।”
ए काम ले केवल रामनारायण के परिवार भर लाभान्वित नइ होय हे, भलुक गाँव के आन किसान मन ल घलोक प्रेरणा मिले हे। दहिदा पंचायत म ए कुआं निर्माण काम ह जल संरक्षण अऊ ग्रामीण आत्मनिर्भरता के दिशा म एक आदर्श उदाहरण प्रस्तुत करे हे।