मुख्यमंत्री श्री विष्णु देव साय नान्हें लइका मन के बीच बइठके स्मार्ट क्लास-रूम ले होइन रू-ब-रू
जशपुर, मुख्यमंत्री श्री विष्णु देव साय सनिच्चर के जशपुर जिला के कांसाबेल के बगिया हाईस्कूल म नान्हें लइका मन के बीच बइठके स्मार्ट क्लास-रूम ले रू-ब-रू होइन। ओ मन ‘सम्पर्क स्मार्ट स्कूल’ कार्यक्रम के शुभारंभ के दौरान कक्षा तीसरी अऊ चौंथी के बालिका मन के बीच बइठिन अऊ बड़ मया के संग उंखर पढ़ई-लिखई के बारे म पूछिन।
मुख्यमंत्री श्री साय ह बगिया म तीसरी कक्षा म पढ़इया डॉली गुप्ता ले ओखर अऊ ओखर गांव के नाम पूछके दुलारत कहिन, “पढ़ई बने सहिन करना हे न… मोबाइल जादा झन देखबे”। उमन सबो लइका मन ल मोबाइल जादा नइ देखे अऊ पढ़ाई म विशेष ध्यान देहे बर कहिन।
जानबा हे के राज्य सरकार संपर्क फाउंडेशन के सहयोग ले जशपुर जिला के 50 प्राथमिक शाला मन म ‘सम्पर्क स्मार्ट स्कूल-स्मार्ट ब्लॉक’ कार्यक्रम संचालित करत हे। शासकीय स्कूल मन ल निजी स्कूल मन ले बेहतर बनाए अऊ कक्षा म सीखे के गुणवत्ता म सुधार करे के उद्देश्य ले ये कार्यक्रम संचालित करे जात हे। एखर तहत संपर्क फाउंडेशन सबो स्कूल मन ल निःशुल्क टीवी सेट अऊ सम्पर्क टीवी स्मार्ट स्कूल किट प्रदान करही। राज्य शासन के ए पहल ले करीब 3200 लइका मन ल प्रत्यक्ष लाभ मिलही। ए स्कूल मन म कार्यरत 120 शिक्षक मन ल टीचिंग-लर्निंग मटेरियल्स उपलब्ध कराए के संग संपर्क के प्रभावी शिक्षण पद्धति के प्रशिक्षण देहे जाही।
मुख्यमंत्री श्री विष्णु देव साय ह बगिया म ‘सम्पर्क स्मार्ट स्कूल-स्मार्ट ब्लॉक’ के शुभारंभ के सराहना करत कहिन के हमर उद्देश्य लइका मन के सीखे के क्षमता ल बढ़ाना हे। ‘स्मार्ट स्कूल्स, स्मार्ट ब्लॉक्स’ कार्यक्रम स्कूल मन म पढ़ना अऊ पढ़ाना आसान बनाही। ये पहल लइका मन म वैज्ञानिक दृष्टिकोण विकसित करही। ये शिक्षक मन ल प्रशिक्षित करके शिक्षण प्रक्रिया ल व्यवस्थित अऊ सरल बनाही, जेखर से क्लास-रूम म पढ़ाई लइका मन बर आनंददायक बन सकय। ये संसाधन वैश्विक शिक्षण पद्धति मन उपर आधारित हे, जेन एससीईआरटी (SCERT) अऊ निपुण भारत (NIPU Bharat) के लक्ष्य के मुताबिक हे।
“पढ़ई बने असन करना हे न… मोबाइल जादा झन देखहू”
