राजनांदगांव जिला म खातू बेचइया दुकन मन के चलत हे ओरीपट्टा जांच

सिन्हा कृषि केंद्र डोंगरगढ़ ल अनियमितता के सेती नोटिस जारी, रिकार्ड जब्त
राजनांदगांव, कलेक्टर डॉ. सर्वेश्वर नरेन्द्र भुरे के हुकुम के मुताबिक राजनांदगांव जिला म खाद वितरण व्यवस्था म सतत निगरानी अऊ उर्वरक बेचइया संस्थान मन के जांच-पड़ताल करे जात हे। इही कड़ी म डोंगरगढ़ विकासखंड के सिन्हा कृषि केंद्र म अनियमितता के शिकायत मिले रहिस, जेमा कृषि विभाग ह जांच करिस त संचालक ह संतोषजनक कागद प्रस्तुत नइ कर पाइस त वोला नोटिस जारी करे गीस, संगेच ओ संस्थान के पंजी मन ल जब्त करे गीस।
कृषि विभाग ले मिले जानकारी के मुताबिक जिला म किसान मन ल समय म यूरिया अऊ डीएपी खाद के उपलब्धता ठउका करे बर कंपनी मन ले समन्वय करके सरलग आपूर्ति अऊ भंडारण के व्यवस्था करे जात हे। जिला म खरीफ सीजन के समय धान के फसल गभोट अवस्था म हे, अइसन म खाद के उपलब्धता ल सर्वाच्च प्राथमिकता देहे गए हे।
उप संचालक कृषि श्री टीकम सिंह ठाकुर ह बताइस के राजनांदगांव रेक पॉइंट संग रायपुर, तिल्दा अऊ बालोद रेक पॉइंट ले सरलग यूरिया अऊ डीएपी खाद के आपूर्ति करे जात हे। प्राप्त खाद ल सीधा डबल लॉक केंद्र मन के माध्यम ले समिति मन म भंडारित कराए जात हे। हाले म डोंगरगांव विकासखंड के ग्राम अर्जुनी म श्रीराम कृषि केंद्र के माध्यम ले 70 किसान मन ल शासन कोति ले निरधारित दर 266 रुपिया 50 पइसा प्रति बोरी म 70 बोरी यूरिया खाद बांटे गीस।
ए साल राजनांदगांव जिला म खरीफ फसल मन बर 20,500 मीट्रिक टन यूरिया खाद भंडारण के लक्ष्य रखे गए रहिस, जेखर विरुद्ध अब तक 16,300 मीट्रिक टन के आपूर्ति हो गे हे। अइसनहे 5,000 मीट्रिक टन के लक्ष्य के तुलना म 7,000 मीट्रिक टन डीएपी खाद किसान मन ल बांटे जा चुके हे। एखर अलावा, 12,000 बोतल नैनो यूरिया अऊ 10,000 बोतल नैनो डीएपी के भंडारण करे गीस, जेमें ले 7,000 बोतल किसान मन ल बांटे गए हे।