रायपुर, 17 जून 2020। प्रदेश म अंग्रेजी माध्यम स्कूल बर 20 जून ले दाखिला चालू हो जाही. राज्य सरकार ह एजुकेशन के ये माडल प्रोजेक्ट बर तईयारी कर ले हे. प्राचार्य मन के नियुक्ति होगे हे, त ऊहचे कई स्कूल मन म शिक्षक मन के तैनाती घलो होगे हे. ये सबके बीच जोन स्कूल म शिक्षक मन के कमी हे, ऊहां संविदा अऊ प्रतिनियुक्ति के आधार म शिक्षक मन के तैनाती करे जावत हे. ये कड़ी म धमतरी ले शिक्षक मन के संविदा नियुक्ति के विज्ञापन ल जारी करे गे हे.
ये विज्ञापन के माध्यम ले शिक्षक पद बर अहर्ता प्राप्त लोग मन ह 26 जून के संझा पांच बजे तक अपन आवेदन ल जमा कर सकत हे. व्याख्याता, शिक्षक, सहायक शिक्षक के आलावा कम्प्युटर शिक्षक अऊ सहायक शिक्षक विज्ञान पद बर आवेदन ल आमंत्रित करे गे हे.
व्याख्याता के 11 पद, शिक्षक के 4 पद, सहायक शिक्षक के 4 पद, कम्प्युटर शिक्षक के एक पद अऊ साइंस शिक्षक के 3 पद बर विज्ञापन जारी करे गे हे. व्याख्याता के बर बीएड के संग स्नातकोत्तर के डिग्री, शिक्षक पद बर स्नातक के संग बीएड के डिग्री, सहायक शिक्षक बर 12वीं के संग बीएड या डीएड के डिग्री, साइंस टीचर बर 12वीं के संग डीएड या डीएलएड के डिग्री अउ कंप्युटर शिक्षक के बर कंप्युटर के डिग्री मांगे गे हे.
