- पंचायत अउ ग्रामीण विकास विभाग ह 2215 गौठान मन ल जारी करिस 8.86 करोड़ रूपिया
- खुला घूमइया मवेसी मन के नियंत्रण, व्यवस्थापन अऊ गौठान मन के रखरखाव अउ संचालन उपर खर्च करे जाही राशि
रायपुर, 19 जून 2020। राज्य शासन के पंचायत अउ ग्रामीण विकास विभाग कोति ले रोका-छेका के प्रभावी अमल बर गौठान प्रबंधन समिति मन ल कुल आठ करोड़ 86 लाख रूपिया के राशि जारी करे गए हे। शासन के महत्वाकांक्षी नरवा, गरवा, घुरवा, बारी योजना के तहत संचालित हर गौठान ल 40 हजार रूपिया देहे गए हे। गौठान प्रबंधन समिति मन के माध्यम ले खुला म घूमइया मवेसी मन के नियंत्रण अऊ व्यवस्थापन म ये राशि खर्च करे जाही। खुला चराई ल रोके अऊ फसल के सुरक्षा बर गौठान के व्यवस्था ल सशक्त बनाए, ऊंखर रखरखाव अऊ संचालन म घलोक ये राशि के उपयोग करे जाही। विभाग कोति ले 2215 गौठान मन ल पहिली किश्त के रूप म हर एक गौठान 40 हजार रूपिया के मान ले अनुदान राशि जारी करे हे।
मुख्यमंत्री श्री भूपेश बघेल के हुकुम म परंपरागत रोका-छेका प्रथा ल प्रभावी ढंग ले लागू करे बर गौठान मन के माध्यम ले किसान मन अऊ पशुपालक मन के मदद बर गांव मन ल ये राशि उपलब्ध कराए जात हे। आप मन जानतेच हव के मुख्यमंत्री ह अवइया खरीफ मौसम ल देखत खुला चराई ल रोके, पैदावार बढ़ाय अऊ बहुफसली क्षेत्र मन के विस्तार बर गांव मन अऊ शहर मन म रोका-छेका के आह्वान करे हें। एखर से खेत, बाड़ी अऊ उद्यान मन के सुरक्षा के संग पशुधन घलोक सुरक्षित रइहीं। रोका-छेका प्रथा ल गंभीरता ले लागू करे 19 जून ले 30 जून तक प्रदेश के सबो गांव मन अऊ शहर मन म मनखे आपस म चर्चा करके रणनीति बनावत हें। पंचायत अउ ग्रामीण विकास मंत्री श्री टी.एस. सिंहदेव के निर्देश म विभाग के माध्यम ले गौठान प्रबंधन समिति मन ल ये अनुदान उपलब्ध कराए जात हे।
