मुख्यमंत्री ह दर्शक दीर्घा ले लईका मन ल बला के ओमन ल उड़वाए ब दिहिस फुग्गा
रायपुर, नेहा राठौर के खबर/ मुख्यमंत्री श्री भूपेश बघेल के लईका मन सो परेम ह जग जाहिर हे। मुख्यमंत्री चाहे कोनो जघा कुछु बुता म रहे लईका मन ल देख के रूक जाथे अउ ओमन करा गोठ बात करथे।भेंट मुलाकात म घलो मुख्यमंत्री ह कई घ अपन सुरक्षा अउ प्रोटोकाल ल टोरके लईका मन करा मिलिस अउ गोठियाईस। मुख्यमंत्री ह लईका मन के मन ल समझ के बोर्ड परीक्षा म अव्वल आए लईका मन ल हेलीकाप्टर म एक सवारी (जॉय राइड) घलो करवाईस अउ लईका मन ल बढ़िया सीच्छा ब प्रदेश म स्वामी आत्मानंद उत्कृष्ट अंग्रेजी विद्यालय के सुरूआत घलो करिस।
मुख्यमंत्री के ए लईका मन करा परेम के एक रूप आज रईपुर के चंदखुरी म इस्थित नेताजी सुभाष चंद्र बोस राज्य पुलिस अकादमी म घलो देखे ल मिलिस। दीक्षांत समारोह के बेरा मुख्यमंत्री ल शांति के प्रतीक के रूप म रंग बिरंगी फूग्गा उडवाए ब दिए गए रहीस हे। मुख्यमंत्री ह देखिस के तीर म दर्शक दीर्घा म लईका मन बईठे हे अउ ओखर कती ल देखत हे। मुख्यमंत्री ह आघू म खड़े दू झन लईका मन ल अपन तीर म बलाइस अउ शांति के प्रतीक फूग्गा ल ओ लइका मन के हाथ म दे दिहीस अउ लईका मन ह ओ फूग्गा ल हवा म उडवाइस।
मुख्यमंत्री ह लइका मन ल अपन तीर म बला के फुग्गा ल दीहिस तेला देख के ओमेर उपस्थित सब लोगन मन ह सराहना करिस अऊ ताली घलो बजइस।
