रायपुर। देश भर म तेजी ले बढ़त कोरोना वायरस के महामारी ल देखत हुए छत्तीसगढ़ के रायपुर जेल प्रशासन ह एक बड़े फैसला ले हे. अब जेल म कैदी मन ले उंखर परिजन मुलाकात नई कर सके. जेल प्रशासन ह 31 मार्च तक जेल म कैदी मन ले मिले म रोक लगा दे हे.
रायपुर केंद्रीय जेल के डीआईजी केके गुप्ता ह जानकारी देवत हुए बताये हे कि कोरोना वायरस के संक्रमण झन फैले एखर बर 31 मार्च तक कैदी मन ले परिजन मन के मुलाकात करे बर रोक लगाये गे हे. सावधानी के तौर म ये फैसला ले गे हे. हालांकि विकल्प के तौर म कैदी मन ल ट्रेजिंग, कॉलिंग सिस्टम के माध्यम ले पारिजन मन ले बात करे बर अतिरिक्त समय दे जावत हे.
बता देथन कि प्रदेश भर म कोरोना वायरस के कारण ले शासकीय कार्यक्रम आयोजन मन ल टाल दे गे हे. एखर संग ही राज्य के सबो स्कूल-कॉलेजों, जिम, स्वीमिंग पूल, वाटर पार्क, लाइब्रेरी, सार्वजनिक जगह मन ल एहतियात के तौर म 31 मार्च तक बंद करे जाये के भी निर्देश दे हे.
