मुख्यमंत्री दाऊ भूपेश बघेल ह प्रदेश म कोरोना संक्रमण के ताजा हालात के लीन जानकारी

रायपुर. 21मार्च 2021। कोरोना टीकाकरण अउ कोविड-19संक्रमण ल थाम्हे बर करे गेहे बेवस्था के समीक्षा करीन। कोरोना संक्रमण म प्रभावी नियंत्रण बर मुख्य सचिव ल आने आने विभाग संग बैठक कर के आवश्यक दिशा-निर्देश लउहे जारी करे के निर्देश दीन।
मुख्यमंत्री दाऊ भूपेश बघेल ह आज अपन घरू कार्यालय म मंत्री परिषद के सदस्य मन संग प्रदेश म कोरोना टीकाकरण अउ कोविड-19संक्रमण ल थाम्हे बर करे गेहे बेवस्था के समीक्षा करीन। उन्मन बाढ़त कोरोना संक्रमण ल थाम्हे खातिर बचाव के जम्मो आवश्यक उपाय अउ दिशा-निर्देश मन ल लउहे जारी करे के निर्देश दीन। उन्मन जम्मो जगा मास्क के उपयोग अउ शारीरिक दूरी के नियम ल कड़ई ले पालन करवाए बर कहीन।
मंत्रिपरिषद के ये ऊँच स्तरीय बइठका म स्वास्थ्य मंत्री श्री टी.एस. सिंहदेव अउ खाद्य मंत्री श्री अमरजीत भगत वीडियों क्राॅन्फ्रेस ले जुड़े।
मुख्यमंत्री ह इही महीना अवइया फागुन तिहार के संगे -संग बर -बिहाव, मरनी -हरनी अउ आने आने सार्वजनिक आयोजन मन के संबंध म मुख्य सचिव के अध्यक्षता म गृह, स्वास्थ्य, नगरीय, स्कूल शिक्षा, उच्च शिक्षा, महिला अउ बाल विकास, पंचायत अउ ग्रामीण विकास, पर्यटन अउ सामान्य प्रशासन विभाग के अधिकारीमन ले चर्चा करके लउहे बचाव के जम्मो आवश्यक उपाय अउ दिशा-निर्देश मन ल जारी करे के निर्देश दीन।