रायपुर, 01 अप्रैल 2020। छत्तीसगढ़ सरकार कोति ले कोरोना वायरस (कोविड-19) संक्रमण ल देखत प्रदेश म लॉकडाउन करे गए हे। अइसन हालत म दिव्यांगजन मन ल जरूरी संसाधन के उपलब्धता म परेशानी के सामना झन करना परय, एखर बर राज्य आयुक्त दिव्यांगजन श्री प्रसन्ना आर. ह सबो कलेक्टर मन सह अध्यक्ष डी.डी.एम.ए. ल चिट्ठी लिखके दिव्यांगता समावेशी दिशा-निर्देश जारी करे हें। जारी चिट्ठी म कहे गए हे के भारत सरकार के दिशा-निर्देश के मुताबिक दिव्यांगजन ल जरूरी सेवा जइसे भोजन, दवई आदि के पहुंच ल सुलभ करे बर गैर सरकारी संगठन अऊ सिविल सोसायटी संगठन, आवासीय कल्याण संघ मन ले समन्वय स्थापित करके काम करे जा सकत हे। एखर बर जिला म समाज कल्याण अधिकारी ल नोडल अधिकारी बनाए गए हे। ये अधिकारी दिव्यांगजन मन ल सहायता अऊ मदद उपलब्ध कराहीं।
मुख्य आयुक्त दिव्यांगजन ह दिव्यांग मन के देखभाल करइया गैर सरकारी संगठन मन के सदस्य मन ल आवागमन के अनुमति नइ होए के सेती होवत परेशानी ल देखत सबो कलेक्टर मन ले वस्तुस्थिति ल ध्यान म रखत दिव्यांगजन मन के सहायता बर गैर सरकारी संगठन, सिविल सोसायटी संगठन अऊ आवासीय कल्याण समिति संगठन मन ल आए-जाए के अनुमति जारी करे ल कहे गए हे। जानबा हे के केन्द्रीय सामाजिक न्याय अउ अधिकारिता मंत्रालय, दिव्यांगजन सशक्तिकरण विभाग, नई दिल्ली कोति ले नोवल कोरोना वायरस संक्रमण के सेती आपातकालीन स्वास्थ्य स्थिति के समय दिव्यांगजन मन के सुरक्षा बर राज्य मन ल व्यापक निर्देश जारी करे गए हे।