जांजगीर-चांपा म समूह के महिला मन बनिन कोरोना फाइटर

एनआरएलएम ले जुड़े महिला समूह ह बनाइन 92 हजार मास्क

जांजगीर-चांपा, 1 मई 2020। कोविड-19, महामारी के समय लागू लॉकडाउन म जिला के राष्ट्रीय ग्रामीण आजीविका मिशन ले जुड़े स्व सहायता समूह के महिला मन ह कोरोना फाइटर के जइसे काम करत कॉटन के 92 हजार मास्क तियार करे हें। जब बाजार म मास्क के किल्लत रहिस अइसन समय म दिन-रात काम करत मनखे मन ल ये मन डबल लेयर के मास्क कम कीमत म मुहैया कराके कोरोना वायरस ले लड़े म अपन भूमिका के निर्वहन करत हें। ये मास्क कोरोना वायरस ले बचाव अउ नियंत्रण बर कारगर सिद्ध होवत हे।

जिला के 134 समूह के 213 महिला मन ह लॉकडाउन के समय घर म रहत कॉटन के कपड़ा के डबल लेयर मास्क के सिलाई करत करीबन 92 हजार मास्क तियार करे हें। कई रंग म तियार ये मास्क मनखे मन ल बहुत पसंद आवत हे। सहायक परियोजना अधिकारी श्री आकाश सिंह के बताती जिला म समूह मन ह लगातार कपड़ा के मास्क बनाए के काम करत हें। जिला म 92 हजार मास्क बनाए गए हे। जेमां पामगढ़ विकासखण्ड म 22 हजार 716, बलौदा म 4 हजार 812, नवागढ़ म 9 हजार 703, सक्ती म 11 हजार 598, मालखरौदा म 11 हजार 494, डभरा म 5 हजार 320, बम्हनीडीह म 13 हजार 125, जैजैपुर म 8 हजार 961, अकलतरा म 4 हजार 562 मास्क अब तक बनाए गए हे।