-मुख्यमंत्री ह दीन दुर्ग जिला ल 114 करोड़ रूपिया के विकास कार्य के दीन सौगात
-वीडियो कांफ्रेंसिंग के माध्यम ले मुख्यमंत्री श्री भूपेश बघेल नगर निगम भिलाई, दुर्ग अऊ भिलाई-चरौदा म बड़बड़ अकन विकास कार्य मन के करिन भूमिपूजन-लोकार्पण
-56.31 करोड़ रूपिया के लागत ले बनइया ट्रांसपोर्ट नगर के करिन भूमिपूजन, 16.19 करोड़ रूपिया के लागत ले बनइया गौरवपथ के करिन भूमिपूजन
दुर्ग, 26 मई 2021। जिला के कई ठन निगम मन म आज 114 करोड़ के लोकार्पण अऊ भूमि पूजन कार्यक्रम के मौका म मुख्यमंत्री श्री भूपेश बघेल ह कहिन के दुर्ग जिला म जिला प्रशासन अऊ जनप्रतिनिधि मन ह बड़ मेहनत करके संक्रमण ल कम करे म जेन भूमिका निभाए हें, वो अभूतपूर्व हे। देशभर म आज दुर्ग जिला के प्रशंसा होवत हे। कोरोना के बढ़त प्रकरण के बीच दुर्ग जिला म डॉक्टर, मेडिकल स्टाफ, निगम कर्मी, मितानिन, आंगनबाड़ी कार्यकर्ता अऊ कोरोना संक्रमण ले जुड़े अधिकारी कर्मचारी मन के संकल्प अऊ आम जनता के जागरूकता के चलते जिला म कोरोना संक्रमण ल 3 प्रतिशत तक लाय म सफलता मिले हे, ये अभूतपूर्व हे। मुख्यमंत्री ह कहिन के कोरोना के दुसर लहर म बढ़त संक्रमण के बाद घलव एखर से लड़े के हमर संकल्प प्रभावित झन होवय, हमन कोरोना संक्रमण ल थात्म्हे बर बड़ मेहनत करेन अऊ एला नियंत्रित करे म सफल होए हन। लॉक डाउन म शिथिलता दे गए हे, कोरोना संक्रमण तेजी से कम होए हे। मुख्यमंत्री ह ये मौका म कहिन के ट्रांसपोर्ट नगर के बने ले यातायात ले संबंधित दिक्कत कम होही। ट्रांसपोर्टर्स ल आसानी होही, गौरव पथ बहुतेच सुंदर सुविधाजनक सड़क होही।
