आम जनता ले कोरोना संक्रमण के रोकथाम अऊ बचाव के गाइड लाइन के पालन करे के अपील करिन
रायपुर, 13 सितमबर 2020। मुख्यमंत्री श्री भूपेश बघेल ह आज बिहनिया इहां अपन निवास परिसर ले कोरोना संक्रमण के प्रभावी रोकथाम बर रायपुर शहर अउ ग्रामीण क्षेत्र म व्यापक जागरूकता कार्यक्रम के तहत ’कोरोना विजय रथ’ ल झंडा देखाके रवाना करिन।
मुख्यमंत्री श्री बघेल ह ए अवसर म आम जनता ले कोरोना संक्रमण के रोकथाम अऊ बचाव के गाइड लाइन के पालन करे के अपील करत कहिन के फिजिकल डिस्टेंस के पालन करव, मास्क लगावव, सेनेटाइजर साबुन ले हाथ धोवव, भीड़ म जाय ले बचव। राज्य सरकार पूरा ताकत ले ए लड़ाई म जुटे हे, सामाजिक अऊ औद्योगिक संगठन मन के जुड़े ले हमर ताकत बाढ़ गए हे। सबो के सहयोग ले हम कोरोना के खिलाफ ये लड़ई खच्चित जीतबो।
रोटरी व जेसीस क्लब जइसे बड़का सामाजिक संस्था मन ए जागरूकता कार्यक्रम के संचालन करत हें। एखर अंतर्गत रायपुर के कई ठन वार्ड अऊ आवासीय बस्ति मन म, मोहल्ला मन म 6 कोरोना विजय रथ के संचालन ए संस्था मन के सहयोग ले करे जाही।
ए रथ के माध्यम ले आम मनखे मन ल मास्क पहिरे, सामाजिक दूरी के नियम के पालन करे, भीड़-भाड़ ले बचे, व्यक्तिगत स्वच्छता के विशेष ध्यान रखे के संदेश के संग सर्दी, खांसी, बुखार, फ्लू, स्वाद अऊ गंध के पता नइ लगना जइसे लक्षण म चिकित्सक मन ले परामर्श अऊ दवा के संबंध म अवगत कराए जाही। कोरोना मुक्ति रथ के माध्यम ले जरूरी जानकारी ले संबंधित पाम्प्लेट्स घलोक वितरित करे जाही। ए अवसर म स्वास्थ्य मंत्री श्री टी.एस. सिंहदेव, गृहमंत्री श्री ताम्रध्वज साहू, उद्योग मंत्री श्री कवासी लखमा, विधायक श्री सत्यनारायण शर्मा, नगरनिगम रायपुर के महापौर श्री एजाज ढेबर, पूर्व रोटरी प्रेसीडेंट श्री राकेश चतुर्वेदी, रोटेरियन आई.जी.पी.डी. श्री रंजीत सिंह सैनी, जे.सी.आई सुपर चेप्टर के संस्थापक श्री राजेश अग्रवाल, रोटरी प्रेसिडेंट श्री दिलीप मोहंती, सेक्रेटरी रोटेरियन श्री राजेन्द्र जैन, नीको के सी.ई.ओ. श्री एम.पी. सिंह, नीको प्रेसिडेंट श्री आशीष अग्रवाल घलोक उपस्थित रहिन।
