देरी म अस्पताल पहुंचना कोरोना ले मउत के प्रमुख कारण: एकरे सेति भर्तीच के दिन होवत हे अधिकतर मउत

बलौदाबाजार, 23 अप्रैल 2021 शुकवार । कोरोना के दूसरइया लहर ले जिला म मउत उदुपहा बाढ़ गेहे। प्रतिदिन लगभग 10 लोग काल-कवलित होवत हे । पीछू सप्ताह होय मउत के आंकड़ा ले प्रशासन के चिन्ता बढ़ा दे हे। जिला म अब तक कोरोना ले 238 लोगन के मउत हो चुके हे। विश्लेषण करे म प्रमुख तथ्य ये उभरके आये हे कि मरीज बीमारी के अंतिम अवस्था म अस्पताल पहुंचत हे। उन्कर मउत अस्पताल म भरतीच के दिन नइते दूसरइया दिन रिकार्ड करे गे हवय । एकर कारण ये हो सकत हे कि शुरुआत म वोमन लक्षण मन ल छुपावत हें। स्थानीय स्तर म झोला-छाप डॉक्टर मन ले इलाज करवात रहिथे । जब स्थिति गंभीर अउ नियंत्रण ले बाहिर होए लगथे तब वोमन अस्पताल कोति आथे। तब तक विशेषज्ञ डॉक्टर मन के हाथ ले तको मामला निकल चुके होथे। अइसन हालात झन आवन देहे के अपील जिला कलेक्टर सुनील कुमार जैन ह करे हवय।
कलेक्टर ह कहीन कि कोरोना बीमारी के प्रति प्रशासन संजीदा हवय। कोरोना के पहचान से लेके इलाज तक के जिला म पोठहा इंतजाम हे। विकासखण्ड मुख्यालयों म लगभग 800 बिस्तर के कोविड केयर सेण्टर स्थापित हवय। जिला मुख्यालय बलौदाबाजार के नवा मण्डी परिसर म तको 600 बिस्तर अस्पताल अबड़े लउहे काम करे लगही। प्रशासन युद्धस्तर म एला शुरू करे के काम म लगे हे। उन्मन लोगन ले अनुरोध करे हें कि ये बीमारी ल हल्का म झन लेवयं। लक्षण के थोरको आभास होते ही तुरते कोरोना जांच करावयं। स्वास्थ्य विभाग ह फोकट म जांच के व्यवस्था कर रखे हे। सिरदर्द, बदनदर्द, सर्दी, खांसी, बुखार, स्वाद न होना आदि कोरोना के प्रारम्भिक लक्षण हरे। हमेशा मास्क के उपयोग, हर एक घण्टा म साबुन से हाथ धोना अउ भीड़-भाड़ ले दूरिहा रहना कोरोना ले बचाव के रामबाण उपाय सिद्ध होय हें।
45 बछर ले ज्यादा उमर के 60 प्रतिशत लोगन ल लग चुके हे पहला टीका
जिला म 45 बछर ले ज्यादा उमर के लगभग 60 प्रतिशत लोगन ल कोरोना के पहला टीका लगए जा चुके हे । 22 तारीख तक 1.72 लाख लोगन ल टीका लग चुके हे। 1 मई ले 18 बछर ले ज्यादा उमर के लोगन के तको टीकाकरण शुरू हो जाही । एकर कार्य-योजना तियार करे जावत हे । उन मन कहीन कि कोरोना ले बचाव के येह महत्वपूर्ण उपाय हरे। एकर सेति हर पात्र व्यक्ति ल टीका अवश्य लगवाना चाही ।