रइपुर, 15 अप्रैल 2021 बिरस्पत । मुख्यमंत्री दाउ भूपेश बघेल ह प्रदेश म कोरोना के बाढ़त संक्रमण ले उपजे स्थिति उपर कइयो अकन समाज के प्रमुख मन ले आज वीडियो कॉन्फ्रेंस ले चर्चा करीन। उन मन कोरोना महामारी ले निपटे बर सामाजिक संगठन मन ले सहयोग के अपील करीन । उन मन कहीन कि सरकार तीरन संसाधन सीमित हवयं। सरकार संग समाज के जुड़े जे संसाधन कई गुना बाढ़ जथे । कोरोना संक्रमण के रोकथाम बर पाछू बछर बरोबर ये पइत तको सबो समाज के लेागन मन के सक्रिय सहयोग जरूरी हवय। उन मन वर्तमान म कतकोन अकन सामाजिक संगठनों कोति ले उपलब्ध कराय जावत सहायता बर उन ल धन्यवाद दीन।
दाउ बघेल ह कहीन कि बचावेच ह सुरक्षा हरे। एकर बर लोगन मन के जागरूक होना जरूरी हे । मास्क के उपयोग, शारीरिक दूरी अउ हाथ मन के बने साफ-सफई ले संक्रमण ले बाचे जा सकत हे।
मुख्यमंत्री ले चर्चा के दौरान कइयो अकन समाज मन के प्रतिनिधि मन ह मुख्यमंत्री ल आश्वस्त करीन कि वो मन कोविड-19 के प्रबंधन म अपन सामाजिक भवन, छात्रावास, वालिंटियर, भोजन उपलब्ध करई, ऑक्सीजन आपूर्ति अउ आने कोनो किसम के सहयोग बर सहर्ष तियार हवयं । वीडियो कॉन्फ्रेंस म मनवा कुर्मी समाज, छत्तीसगढ़ कंवर समाज, राजपूत-क्षत्रिय महासभा, माहेश्वरी समाज, छत्तीसगढ़ सिंधी पंचायत, महाराष्ट्र मंडल, साहू समाज, मसीही समाज, जैन समाज अउ देवांगन समाज के प्रमुख संघरे रिहिन ।