अस्पताल ले भागिस कोरोना मरीज, पाजिटिव आय के बाद भर्ती कराय गे रिहिस

रायपुर, 21 जुलाई 2020। राजधानी रायपुर के मेकाहारा ले कोरोना मरीज के भागे के मामला आगु आय हे। बताये जावत हे कि मरीज ह भाग के नवा रायपुर पहुंच गिस। एखर सूचना ल प्रशासन ल दे देहे गए हे। जेखर बाद ओला अस्पताल लाय के कवायद करे जावत हे। मिले जानकारी के अनुसार युवक ह जगदलपुर के रहने वाला हे। ए युवक ह नवा रायपुर के कोनो संस्थान म कुक के काम करत हे। ओखर दिमागी हालत कुछ ठीक नई हे, जेखर सेती परिजन मन ह ओला अस्पताल म भर्ती कराये रिहिस। ए दौरान ओखर कोरोना जांच घलो होइस, जेखर रिपोर्ट ह सोमवार के पाजिटिव आय रिहिस। एखर बाद ओला रायपुर के मेकाहारा अस्पताल म भर्ती कराये गे रिहिस।