कोरोना पॉजिटिव छात्र घलो दे सकही बोर्ड परीक्षा, माध्यमिक शिक्षा मंडल ह जारी करिन गाइडलाइन

रायपुर, 24 फरवरी 2021। छत्तीसगढ़ माध्यमिक शिक्षा मंडल ह बोर्ड परीक्षा के संबंध म नवा गाइडलाइन जारी करे हे। ये नियम कोरोना संक्रमित छात्र मन के संबंध म जारी करे गए हे। बोर्ड परीक्षा के बेरा यदि कोनो छात्र कोरोना संक्रमित होवत हे त वो घलो गाइडलाइन के अनुसार परीक्षा म शामिल हो सकही। एखर बर माध्यमिक शिक्षा मंडल के डाहर ले व्यवस्था करे जाही। कोरोना संक्रमित छात्र ल 1 दिन पूर्व सेंटर म जानकारी देना होही। अइसे छात्र के परीक्षा अलग कक्ष म लेहे जाही। छात्र के कॉपी घलो सामान्य कॉपी ले अलग रखे जाही। परीक्षा ड्यूटी म तैनात पर्यवेक्षक पीपीई कीट पहिन के कक्ष म रही।