कोरोना संदिग्ध के इलाज के बेरा मउत, बिलासपुर के सिम्स म रहिस भर्ती

रायपुर, 23 मई 2020। प्रदेश के न्यायधानी बिलासपुर ले एक बड़का ख़बर निकल के आगु आवत हे. जानकारी के अनुसार सिम्स अस्पातल म भर्ती एक कोरोना संदिग्ध व्यक्ति के मउत होगे हे. मृतक मजदूर रहिस अउ 20 मई के पुणे ले लहुटे रहिस. इंहा आये के बाद ले उमन ल मस्तुरी स्थित क्वारेंटाइन सेंटर म रखे गये रहिस. जहाँ उमन ल सर्दी-खांसी के संग सांस ले म तकलीफ होय के बाद बिलासपुर स्थित सिम्स अस्पताल म भर्ती कराये गये रहिस.
अस्पताल म तीन दिन बाद इलाज के बेरा बीमार मजदूर ह दम तोड़ दिस. मजदूर के कोरोना सेंपल लिये गये रहिस, परन्तु रिपोर्ट अभी तक नई आये हे. फिलहाल मजदूर के मउत कोरोना ले होय हे या आने कुछु के सेती ले अभी एखर पुष्टि नई हो पाए हे. जाँच रिपोर्ट आये के बाद मउत के कारण पता चल पाही.