कोरोना वायरस: आम जनता बर सलाह

कोरबा, 11 मार्च 2020। 77 देश मन म लउहे-लउहे ले अपन पांव फेलावत नोवल कोरोना वायरस ले संक्रमित होए के लक्षण, संचार के माध्यम अऊ बचाव के तरीका के पूरा दिशा निर्देश स्वास्थ्य अउ परिवार कल्याण विभाग कोरबा कोति ले जनहित म प्रसारित करे गए हे।
मुख्य चिकित्सा अउ स्वास्थ्य अधिकारी कोरबा डाक्टर बी.बी. बोडे ह बताइस के कोरोना वायरस के लक्षण बुखार, सांस लेने म तकलीफ, नाक बोहाना, जुकाम, छाती म जकड़न, खांसी, सिरदर्द निमोनिया हे अऊ ये वायरस संक्रमित मनखे के खुला जगा म छींके या खांसी ले संक्रमित मनखे ले हाथ मिलाए, गला लगाए, अऊ संक्रमित जगह ले संपर्क म आए के बाद बिना हाथ धोये अपन आंख मुँह अउ नाक ल छूने ले फैलथे।
कोरोना ले बचाव बर संक्रमित मनखे के निकट संपर्क म आए ले बंचे बर, नियमित रूप ले दिन म कई पइत हाथ ल साबुन अउ साफ पानी ले धोये अऊ बिना हाथ धोये अपन आंख मुँह अउ नाक ल नइ छुए अऊ संक्रमित मनखे के संपर्क म आए के बाद आँख या नाक छूए ले बचयं।
श्री बोर्डे ह बताइस कि ओ मन सबो यात्री जेमन 1 जनवरी 2020 के बाद चीन, थाईलैंड, मकाऊ, सिंगापुर, जापान, मलेशिया आदि देश मन के यात्रा करे होंही अऊ ओ मन ल बुखार सर्दी, खांसी या सांस म तकलीफ के लक्षण होही या यात्रा ले वापस आए के 28 दिन के भीतर बुखार, सर्दी ,खांसी, सांस म तकलीफ के लक्षण उत्पन्न होवत हे, त ओ मन नजदीकी जिला अस्पताल या मेडिकल कॉलेज अस्पताल म संपर्क करे अऊ चिकित्सक सलाह लेना चाही।
कोरोना वायरस के सम्बन्ध म जानकारी बर टोल फ्री हेल्पलाइन नंबर 104 म डायल करके जानकारी लेहे जा सकत हे अऊ जिला सर्वेलेंस अधिकारी कोरबा डॉ कुमार पुष्पेश के मोबाईल नंबर 8109799954 म अऊ जिला एपिडेमियोलॉजिस्ट कोरबा डॉ प्रेमप्रकाश आनंद ले मोबाईल नंबर 9303005410 म संपर्क करे जा सकत हे।