रायपुर, 26 मार्च 2020। राज्य शासन कोति ले प्रदेश म लॉकडाउन के बेरा म भिखारी अऊ निराश्रित मनखे मन ल भोजन देहे के आदेश जारी करे गए हे। समाज कल्याण विभाग के सचिव श्री आर. प्रसन्ना ह मंत्रालय महानदी भवन ले आदेश जारी करके राज्य के सबो संभागायुक्त सबो कलेक्टर मन, पुलिस अधीक्षक मन अउ समाज कल्याण विभाग के सबो संयुक्त अऊ उप संचालक मन ल भिखारी अऊ निराश्रित मनखे मन ल भोजन उपलब्ध कराए ल कहे हें।
जारी आदेश के मुताबिक जिला मन म खास तौर म नगरीय क्षेत्र मन म निराश्रित मनखे अउ भिखारी अउ क्षेत्र के जरूरत वाले मनखे मन के चिन्हारी करे जाही। जिला म प्रतिष्ठित स्वैच्छिक संस्था, रेडक्रास सोसायटी, लायंस क्लब, रामकृष्ण मिशन, गायत्री परिवार, गुरूद्वारा, अक्षय पात्र, मारवाड़ी समुदाय अऊ आन समाज सेवी संगठन मन ले सम्पर्क करके निराश्रित मनखे अउ भिखारी मन बर चुरे जेवन तियार करके वोला अलग-अलग पैकेट बनाके बांटे ल कहे गए हे। जिला प्रशासन के मार्गदर्शन ले भोजन ल चिन्हारी करे गए जगा मन म बांटे बर रूट चार्ट बनाए ल घलो कहे गए हे।