कोरोना वायरस के रोकथाम अउ नियंत्रण म सामाजिक संस्था मन के भागीदारी बढ़ाए, मनखे मन ल जागरूक करे अऊ सूचना मन के आदान-प्रदान म होही उपयोगी: श्री भूपेश बघेल
स्वैच्छिक संस्था मन अऊ राज्य योजना आयोग ह तैयार करिस वेबसाईट
रायपुर, 05 जून 2020/ छत्तीसगढ़ म कोरोना वायरस (कोविड-19) के रोकथाम अउ नियंत्रण म सामाजिक संस्था मन के भागीदारी बढ़ाए, मनखे मन ल जागरूक करे अउ जरूरी सूचना मन के आदान-प्रदान करे बर मुख्यमंत्री श्री भूपेश बघेल ह आज इहां अपन निवास कार्यालय म वीडियो काॅन्फ्रेंसिंग के माध्यम ले वालेन्टिरी सर्विस फाॅर कोविड-19 रिस्पांस वेबसाईट https://coronahelp.cgstate.gov.in ‘‘कोरोना (कोविड-19) सहायता पटल‘‘ के लोकार्पण करिन।
ये वेबसाईट के माध्यम ले छत्तीसगढ़ म कोरोना संक्रमण के अपडेट रिपोट, राज्य म क्वारंटाईन सेन्टर मन के सूची, सहयोगी सामाजिक संस्था मन के सूची, केन्द्र अऊ राज्य सरकार के जरूरी निर्देश, क्वारंटाईन सेन्टर निर्देर्शिका, सेन्टर संचालन अउ प्रबंधन बर जरूरी मार्गदर्शिका, गर्भवती महिला मन अउ लइका मन बर मार्गदर्शिका, क्वारंटाईन सेन्टर म रहइया मनखे के मनोबल बढ़ाए के तरीका आदि जानकारी प्राप्त हो सकही। मुख्यमंत्री श्री भूपेश बघेल ह कहिन के ये वेबसाईट छत्तीसगढ़ के अभिनव परयोग हे। एखर माध्यम ले कोरोना संक्रमण के बचाव अऊ रोकथाम, मनखे मन ल राहत पहुंचाए, क्वारेंटाईन सेन्टर के व्यवस्था मन ल सुचारू बनाए अऊ ए सेन्टर मन के प्रबंधन म सहायता मिलही। ये वेबसाईट देश के आन राज्य मन बर घलोक अनुकरणीय होही। उमन कहिन के समाज के सबो वर्ग, जनप्रतिनिधि, अधिकारी-कर्मचारी मन के सक्रिय सहयोग ले छत्तीसगढ़ म कोरोना संकट के चुनौती के सामना करे म काफी हद तक सफलता मिले हे। आगू घलोक हम ए चुनौती के सामना करे म सफल होबोन। मुख्यमंत्री ह ए अवसर म वीडियो काॅन्फ्रेंसिंग के माध्यम ले सपोर्ट आॅर्गेनाईजेशन कांकेर के श्री बंसत यादव, बिलासपुर के श्री भूपेश वैष्णव, यूनीसेफ के श्री जाॅब जकारिया, रायपुर मेडिकल काॅलेज के डीन डाॅ. विष्णु दत्त, आयुर्वेद महाविद्यालय के प्राचार्य डाॅ. जी.एस. बघेल ले चर्चा करिन। श्री बसंत यादव ह क्वारेंटाईन सेंटर म उपलब्ध कराए जात सुविधा मन, मनरेगा श्रमिक मन, म फिजिकल डिस्टेंसिंग के पालन अऊ सेनेटाईजेशन म उंखर संस्था के सहयोग के जानकारी दीन।
ए अवसर म राज्य योजना आयोग के उपाध्यक्ष श्री अजय सिंह, मुख्यमंत्री के अपर मुख्य सचिव श्री सुब्रत साहू, प्रमुख सचिव वन श्री मनोज पिंगुआ, मुख्यमंत्री के सलाहकार श्री प्रदीप शर्मा, श्री विनोद वर्मा, श्री राजेश तिवारी, श्री रूचिर गर्ग, प्रधान मुख्य वन संरक्षक श्री राकेश चतुर्वेदी, पीसीसीएफ अउ प्रबंध संचालक लघु वनोपज संघ श्री संजय शुक्ला, राज्य योजना आयोग के सदस्य श्री के.सुब्रमण्यम अऊ सदस्य सचिव श्री राजेश राणा घलोक उपस्थित रहिन।