दुर्ग, 6 अप्रैल 2020। भीड़ ल नियंत्रित करे बर नगर पालिक निगम भिलाई सुरू ले ही उदीम करत हे। नोवल कोरोना वायरस के खतरा ल देखत कई ठन बजार जिहां भीड़ लगत रहिस उहां के बजार ल बड़े मैदान मन म स्थानांतरित करे गए हे। सघन रूप ले लगइया लक्ष्मी मार्केट ल संजय नगर सुपेला के मैदान म शिफ्ट करे गए हे। अइसनहे पावर हाउस म लगइया बाजार लाल मैदान म शिफ्ट करे गए हे ताकि भीड़ ल नियंत्रित करे जा सकय।
बेरा-बेरा म ए बजार मन के जांच करके भीड़ ल नियंत्रित करे के उदीम सरलग करे जात हे। आज निगम के अमला जेमां जोन स्तर के सहायक राजस्व अधिकारी, उड़नदस्ता के टीम अउ तोड़फोड़ दस्ता के टीम, पुलिस बल के मौजूदगी म आकाशगंगा सब्जी मार्केट, पावर हाउस फल अउ सब्जी मार्केट, संजय नगर सुपेला सब्जी मार्केट, सुपेला लक्ष्मी मार्केट अउ आन बाजार लगइया जगा मन के जांच करिस। रविदास नगर शीतला कांप्लेक्स तीर शशिकला देशमुख ह तंबाकू के उत्पाद के जादा दर म विक्रय करत रहिस संगेच पानी पाउच घलोक बेंचत रहिस, एकर पहिली एला समझाइश देहे गए रहिस के दुकान बंद कर दे फेर ये ह नइ माने रहिस अउ दुकान के संचालन करत रहिस। ये बात म 5000 रुपए जुर्माना वसूल करे गीस।
मनखे मन ले अउ दुकानदार मन ले घलोक घेरी-बेरी अपील करे जात हे के सोशल डिस्टेंस के ध्यान रखव। आज निगम के टीम ह आकाशगंगा सब्जी मार्केट के पहिली जांच करे गीस जहां एक-दू दुकान खुले मिलीस इहां जादातर होलसेल के दुकान हे। ओखर बाद निगम के टीम लक्ष्मी मार्केट सुपेला पहुंचिस जिहां दुकान बंद पाए गीस। संजय नगर सुपेला बाजार पहुंचे म दू आलू प्याज वाले दुकान दार मन ल भीड़ बढ़ाए अउ सोशल डिस्टेंस के पालन नइ करे म 500-500 के जुर्माना दुनों उपर लगाए गीस अऊ मनखे मन ल घलोक समझाइश देहे गीस।
संजय नगर सुपेला मैदान म व्यवसायी मन ल ये घलोक समझाइश देहे गीस के एक दूसर ले सटके दुकान झन लगावव अऊ जऊन फुटकर सब्जी के दुकान हे वो एक समूह म नइ लगय। काल घलोक निगम के अमला बाजार क्षेत्र मन म सक्रिय रहिही अउ सोशल डिस्टेंस के पालन नइ करइया उपर कड़ा कार्यवाही करही। आज महावीर जयंती होए के सेती मांस विक्रय प्रतिबंधित हे। तेकर बाद घलव सेक्टर 5 स्थित राकेश पोल्ट्री सेंटर मांस विक्रय करत रहिस त ओकर उपर 500 रुपिया के जुर्माना करे गीस अउ दुकान ल बंद कराए गीस। संजय नगर सुपेला बाजार अउ लाल मैदान म शिफ्ट बाजार म भीड़ बढ़े के सेती बंद कराए गीस अऊ ठेला म सब्जी बेचइया मन ल ये बाजार म ठेला झन लगाय के सख्त हिदायत देहे गीस। माइक के माध्यम ले मार्केट म अवइया मनखे मन ले अपील करे गीस के सोशल डिस्टेंस बनाके रखव। भीड़ ल नियंत्रित करे बर लाल मैदान अउ संजय नगर सुपेला म लगइया बाजार के व्यवसायी मन ल वैकल्पिक तौर म कुछ अलग जगा म शिफ्ट करे जा सकत हे जेखर बर जगा के चयन करे जात हे ताकि भीड़ ल नियंत्रित करके सोशल डिस्टेंस मेंटेन करे जा सकय। भीड़ ल नियंत्रित करे बर उपायुक्त अशोक द्विवेदी ह बताइस कि शिफ्ट होए बाजार म अब 10 ले 15 सब्जि अउ फल के दुकान ही लगही जऊन ठेला के माध्यम ले विक्रय करत हें वो मन गली-मोहल्ला म जाके विक्रय कर सकत हें अऊ सोशल डिस्टेंस के पालन कर सकत हें।
नेहरू नगर क्षेत्र म सोशल डिस्टेंस के अच्छा उदाहरण देखे जा सकत हे जिहां कुछ सब्जी व्यवसायी मन कोति ले अलग-अलग दूरी बनाके सब्जि के विक्रय करे जात हे संगेच सब्जि अउ फल के ठेला गली-मोहल्ला तक पहुंचत हे जेखर से नागरिक मन ल घर ले निकले के जरूरत नइ परत हे। आम नागरिक मन ले घलोक अपील हे के जब तक बहुत जरूरी काम नइ होवय घर ले झन निकलयं अउ निकलना जरूरी होवय त सोशल डिस्टेंस बनाके रखयं ताकि कोरोना वायरस के संक्रमण एक दूसर म झन फैल सकय। खुद सुरक्षित रहव अऊ दूसर मन ल घलोक सुरक्षित रखे म मददगार बनव।
