- मुख्यमंत्री श्री भूपेश बघेल 19 नवम्बर के दाई-दीदी क्लीनिक के करहीं शुभारंभ
- महिला सशक्तिकरण के दिशा म अभिनव पहल: महिला चिकित्सक मन ह महिला मन के करहीं निःशुल्क उपचार
- मुख्यमंत्री शहरी स्लम स्वास्थ्य योजना के तहत महिला मन बर स्पेशल क्लीनिक के संचालन
रायपुर, 18 नवम्बर 2020। मुख्यमंत्री श्री भूपेश बघेल 19 नवम्बर के पूर्व प्रधानमंत्री स्वर्गीय श्रीमती इंदिरा गांधी के जयंती म महिला मन बर स्पेशल क्लीनिक दाई-दीदी क्लीनिक के शुभारंभ करहीं। महिला मन बर शुरू होत ये स्पेशल महिला मेडिकल मोबाइल क्लीनिक देश म अपन जइसे पहली अजब क्लीनिक होही। क्लीनिक के गाड़ी मन म सिरिफ महिला मरीज मन ल ही निःशुल्क इलाज के सुविधा मिलही। दाई-दीदी क्लीनिक गाड़ी मन म सिरिफ महिला स्टाफ अऊ महिला डॉक्टर, महिला लैब टेक्नीशियन अऊ महिला एएनएम ही काम करहीं। ये क्लीनिक के शुरू होए ले महिला श्रमिक अऊ स्लम क्षेत्र मन म निवासरत महिला मन अऊ नोनी मन ल अपन घर के तीरेच महिला डॉक्टर मन के माध्यम ले इलाज के सुविधा मिलही।
ये क्लीनिक के संचालन मुख्यमंत्री शहरी स्लम स्वास्थ्य योजना के अंतर्गत करे जाही। अभी हाल म प्रदेश के तीन बड़े नगर पालिक निगम रायपुर, भिलाई अऊ बिलासपुर म महिला मन बर एक-एक दाई-दीदी क्लीनिक शुरू करे जात हे। ये क्लीनिक म महिला मन के प्राथमिक उपचार के संगें-संग महिला चिकित्सक मन ह स्तन कैंसर के जांच, हितग्राही मन ल स्व स्तन जांच के प्रशिक्षण, गर्भवती महिला मन के नियमित अऊ विशेष जांच आदि के अकतहा सुविधा होही। महिला अऊ बाल विकास विभाग के सहयोग ले शहर मन म स्थित आंगनबाड़ी के तीर पूर्व निरधारित दिवस मन म ये क्लीनिक स्लम क्षेत्र म लगाए जाही। ये क्लीनिक के संगें-संग गर्भवती महिला, लइका आदि मन बर महिला अऊ बाल विकास विभाग के कई ठन हितग्राहीमूलक परियोजना के लाभ घलोक प्रदान करे जाही।
जानबा हे के जनरल क्लीनिक म महिला मन बर अलग जांच कक्ष अऊ काउंसलर नइ होए ले महिला मन परिवार नियोजन के साधन, कॉपर-टी निवेशन, आपातकालीन पिल्स के उपलब्धता, गर्भनिरोधक गोली, साप्ताहिक गर्भनिरोधक गोली, गर्भनिरोधक इंजेक्शन, परिवार नियोजन परामर्श, एसटीडी परामर्श लेहे म लजाथें। ये महिला क्लीनिक म डेडीकेटेड महिला स्टाफ होए ले अब उमन ये प्रकार के परामर्श निःसंकोच ले सकहीं।
