जनरल बिपिन रावत के बाद कोन होही देश के अगला CDS?

नई दिल्ली, देश के पहिली सीडीएस जनरल बिपिन रावत के बुधवार के दिन हेलीकॉप्टर दुर्घटना म निधन हो गए रहिस। ऊंखर निधन के बाद अब सबले बड़े सवाल हे कि देश के अगला सीडीएस कोन होही। देश म सेना के सबले बड़े पद ल जादा बेरा तक खाली घलोक नइ रखे जा सकय। वरिष्ठता के क्रम म थलसेना अध्यक्ष जनरल एमएम नरवाणे सबले ऊपर हे अऊ एखर सेती ओ मन ल ये पद के सबले बड़े दावेदार माने जात हे, फेर वायुसेना प्रमुख एयर चीफ मार्शल वीआर चौधरी अऊ नौसेना प्रमुख एडमिरल आर हरिकुमार घलोक ये पद के दावेदार हें, काबर के ये पद म वरिष्ठताच भर ह कसौटी नो हे।
कहूं जनरल नरवाणे ल सीडीएस बनाए जाही त थलसेना प्रमुख के ओहदा खाली हो जाही। ये पद के दू प्रमुख दावेदार हें। एमां ले एक हे सह सेना प्रमुख लेफ्टिनेंट जनरल सीपी मोहंती अऊ दूसर हें उत्तरी कमान के प्रमुख लेफ्टिनेंट जनरल वायके जोशी। सीडीएस नियुक्ति के प्रक्रिया बर पहिली रक्षा मंत्रालय तीन वरिष्ठ अफसर मन के नाम नियुक्ति कमेटी ऑफ कैबिनेट ल भेजथे। ये कमेटी म पीएम अऊ गृह मंत्री होथें। जानबा इहू हे के सरकार अभी कोनो कार्यकारी सीडीएस घलोक चुन सकत हे।