मन म हौसला अऊ इच्छाशक्ति होही त सफलता के मिलथे नवा रद्दा

राजनांदगांव, मन म हौसला अऊ इच्छाशक्ति होए ले सफलता के नवा रद्दा खुले लगथे। अइसनहे राजनांदगांव जिला के ग्राम बघेरा के श्रीमती मनीषा यादव के एक सफल उद्यमी बने के रद्दा खुलिस मुख्यमंत्री युवा स्वरोजगार योजना ले। वो ह ये योजना ले मिले 1 लाख 65 हजार रूपिया ले अपन एक रेडिमेड कपड़ा के दुकान खोले हे। जेखर से ओ ल हर बछर 25 ले 30 हजार के आमदनी होवत हे। वो ह बताईस कि मुख्यमंत्री युवा स्वरोजगार योजना बहुत बढि़या हे। एखर माध्यम ले अइसन युवा जिंकर आर्थिक स्थिति ठीक नइ ये, ओ मन ल अपन व्यवसाय चालू करे बर संबल अऊ हिम्मत मिलथे। वो ह ये मदद बर मुख्यमंत्री श्री भूपेश बघेल ल तहेदिल ले धन्यवाद देहे हे।
श्रीमती मनीषा यादव के बताती राज्य आजीविका मिशन अंतर्गत बिहान ले जुडे के बाद वोखर जीवन म बदलाव आइस अऊ ओ ल उहां मुख्यमंत्री युवा स्वरोजगार के संबंध म जानकारी मिलीस। वो ह इहू कहिस के आत्मविश्वास होथे त सफलता मिलथे अऊ आत्मविश्वास बने शिक्षा ले मिलथे। ओ ह अपन बेटा जयेश यादव ल बने शिक्षा देना चाहथे। एखर संगेच अपन व्यवसाय के विस्तार करना चाहथे। वो ह अब तक 1 लाख रूपिया के करजा सफलतापूर्वक पटा चुके हे। लाभ के राशि ले रेडिमेड कपड़ा के दुकान के संग फैंसी स्टोर्स घलोक खोल लेहे हे। वो ह कहिस कि ग्रामीण क्षेत्र मन म एके जगा जम्‍मो सामान नइ मिल पापय, ते पाए के ओ ह गांव म एक छोटकुन मॉल खोलना चाहथे। ताकि गांव के मनखे मन ल एके जगा म सबो सामान मिल जाए।