बिलासपुर, 02 अगस्त 2020। हाईकोर्ट अऊ लोवर कोर्ट मन म 4 अगस्त ले सरलग ऑनलाइन सुनवाई शुरू हो जाही। सुकवार के चीफ जस्टिस के हुकुम के मुताबिक रजिस्ट्रार जनरल नीलमचंद सांखला ह ए सम्बंध म आदेश जारी करिस। हाईकोर्ट बार एसोसिएशन ह बिरसपत के चीफ जस्टिस ल अभ्यावेदन सउंप के अदालत मन म वीडियो कॉन्फ्रेंसिंग के माध्यम ले नियमित सुनवाई शुरू कराए के मांग करे रहिस।
कोरोना संकट के सेती हाईकोर्ट अऊ अधीनस्थ न्यायालय मन म कामकाज बंद होए ले वकील मन के आर्थिक हालत खराब होवत हे। पक्षकार मन ल घलोक राहत नइ मिल पात ये। ए बात ल धियान म राखत हाईकोर्ट म 4 अगस्त ले कामकाज शुरू करे के आदेश चीफ जस्टिस ह जारी करे हे। एखर मुताबिक कोरोना के सेती अब हाईकोर्ट ऑफिस अऊ रजिस्ट्री के काम अऊ कोर्ट म सुनवाई ऑनलाइन होही। जिला न्यायालय मन म घलोक महत्वपूर्ण मामला मन के पहिली जइसे सुनवाई करे जाही।
