जब मंटूराम ह मुख्यमंत्री ल बताइस कि पत्नी संग रातभर करथंव गोबर के चौकीदारी

बीजापुर, गोबर के चौकीदारी । हव जी, सुने म अटपटा जरूर लगही फेर ये सही ये। छत्तीसगढ़ के बीजापुर जिला के कुटरू म रहइया किसान मंटू राम कश्यप गोबर के चौकीदारी करथे , अऊ ये बात मंटूराम ह खुदे मुख्यमंत्री भूपेश बघेल ल बताइस। मौका रहिस बीजापुर जिला के कुटरू म आयोजित भेंट मुलाकात कार्यक्रम के।
मुख्यमंत्री ल मंटूराम ह बताइस कि रात म टॉर्च बार के गोबर के चौकीदारी करथंव, अऊ ये काम म मोर पत्नी घलोक मोर संग देथे। वो ह बताइस कि ओ ह छत्तीसगढ़ सरकार के गोधन न्याय योजना के तहत गोबर बेंचथे। मंटूराम ह बताइस कि अब तक वो ह करीबन 14 हजार किलो गोबर करीब 28 हजार रुपिया म बेचे हे। मंटूराम बताथे के पहिली गोबर ल कोनो नइ पूछत रहिन फेर अब हरेक के नजर गोबर उपर लगे रहिथे। कुछ दिन पहिली ऊंखर सकेले गोबर ल गांव के कुछ मनखे उठा ले गे रहिन। एखर बाद वो ह तय करिस कि पत्नी के संग रात म गोबर के निगरानी करहीं।
पत्नी के संग शिफ्ट म चौकीदारी – मंटूराम गोबर के चौकीदारी रातभर करथे। वोखर ये काम म वोखर पत्नी घलोक संग देथे। ओ बताथे कि रातभर जागना संभव नइ हे ते पाए के दू शिफ्ट म अपन पत्‍नी के संग गोबर के देखरेख करथें। रात म दूनों टॉर्च लेके गोबर के निगरानी करथें।
आखिर काबर परिस चौकीदारी के जरूरत– मंटूराम बताथे कि रात म टॉर्च लेके ओ ह कई पइत देखथे कि गोबर ल कोनो लेजत तो नइ हे। ओकर कहना हे के जब ले गोबर के कीमत मिले लगे हे, तब ले गोबर सहेज के रखना परथे। एक दिन सकेले गोबर ल कोनो कलेचुप उठा के लेज गए रहिस। एखर बाद ले उमन गोबर के निगरानी करे लगिन।
गोधन न्याय योजना ले मिले रुपिया ले रिपेयर कराइस मकान – मंटुराम कश्यप ह बताइस कि वोखर तिर 15 गाय- भंइसा हे। अब तक गोधन न्याय योजना ले गोबर बेचके करीब 28 हजार रूपिया मिले हे। वोखर मकान ले पानी टपकत रहिस जेन ल बहुत दिन ले रिपेयर कराना चाहत रहिस। गोबर बेचके मिले पइसा ले वो ह मकान रिपेयर करा लीस। मकान म प्लास्टर घलोक कराए हे। अब छत ले पानी टपके के समस्या घलोक खतम हो गए हे।