गोधन ले आईस लछमी, भोजराम अपन जोड़ी बर बिसाईस सोनहा टाप्स

दुर्ग, छत्तीसगढ़ सरकार के गोधन न्याय योजना के माध्यम ले गांव वाले मन के अइसन सउंख घलोक पूरा होवत हे जेन आम तौर म बिहाव, तिहार जइसे मौका म ही पूरा हो पात रहिस। कहूं परिवार के आर्थिक स्थिति बने नइ हे त ए खुसी ल हासिल करे बर करजा लेहे ल परय। गोधन न्याय योजना ह हजारों गोपालक, पहटिया अऊ महिला मन के जीवन म अकतहा आय के जरिया बने के संग ओ मन ल अपन रोजमर्रा के जरूरत के संगें-संग खुसी ल घलोक पूरा करे के अवसर उपलब्‍ध कराए हे।
दुर्ग जिला के आगेसरा म पहाटिया के रूप म काम करत भोजराम यादव ह बताइस कि गोधन न्याय योजना के माध्यम ले वो ह पउर साल गोबर बेचके 27 हजार रुपए कमाईस। ये रकम के सदुपयोग कइसे करे जाए त वो ह अपन पत्नी बर कान बर चउदा हजार रूपिया के सोनहा टाप्स बिसाईस। भोजराम के बताती निशानी के रूप म मैं ह अपन जोड़ी ल एला देंव। ये हमेशा बर यादगार रहे वाला चीज ये अऊ स्त्रीधन ये। भोजराम ह बताइस कि मैं अइसन चीज नइ लेना चाहत रहेंव जे ह उड़ा जाए अइसन चीज चाहत रहेंव, जेन हमेशा रहय अऊ जेकर कीमत घलोक बाढ़त रहय, ते पाए के सोनहा बिसाएंव। जानबा हे के गोधन न्याय योजना के माध्यम ले पहाटि मन के आर्थिक स्तर म विशेष बदलाव आए हे। ग्राम आगेसरा म तीन पहाटिया हे अऊ तीनोंच गोधन न्याय योजना के माध्यम ले बनेच आय प्राप्त करत हें। भोजराम के कहानी बताथे कि छत्तीसगढ़ के ग्रामीण गोधन न्याय योजना के माध्यम ले अपन भविष्य संवारत हें। भोजराज ह अपन पत्नी बर गहना बिसा के पारिवारिक जीवन म खुसी बगराए हे।
मुख्यमंत्री श्री भूपेश बघेल ह किसान, गांव वाले, महिला अउ भूमिहीन मजदूर मन ल आर्थिक रूप ले सशक्त करे अऊ उंखर आय म वृद्धि बर सरलग उदीम करत हें। छत्तीसगढ़ सरकार के राजीव गांधी न्याय योजना, गोधन न्याय योजना, राजीव गांधी ग्रामीण कृषि भूमिहीन मजदूर न्याय योजना के संगें-संग आय के परंपरागत साधन मन ल सशक्त करे के ही परिणाम ये कि ग्रामीण अर्थव्यवस्था ल मजबूती अऊ गांव वाले मन के रोजगार अउ आय म वृद्धि होए हे। माली हालत बेहतर होए ले मनखे अपन रोजमर्रा के जरूरत मन ल पूरा करे के संग अपन सउंख ल घलोक पूरा करे म सक्षम होवत हे। गोधन न्याय योजना ले अकतहा आय ले कोनो अपन लइका मन ल बेहतर उच्‍च शिक्षा देवाए म सक्षम होय हें त कोनो मोटर सायकिल बिसा के अपन जीवन ल गतिशील बनाए हें। पशुपालक मन ह अकतहा आय ले गाय बिसा के अपन आय म बढ़ोत्तरी करे हें। ग्रामीण गोधन न्याय योजना के तहत गोबर बेचे ले होवइया अमदानी ले अपन परिवार के मनखे मन बर सोना-चांदी के जेवर घलोक बिसाए लगे हें।