मंत्री श्री गुरु रूद्र कुमार ह करिन क्राफ्ट बाजार के शुभारंभ

दुर्ग, 12 फरवरी 2020। लोक स्वास्थ्य मंत्री श्री गुरु रुद्र कुमार ह सिविक सेंटर भिलाई म क्राफ्ट बाजार भिलाई के शुभारंभ करिन। उमन शुभारंभ करके उहां लगे स्टाल मन के जांच करिन संगेच व्यवसायी मन के उत्पाद मन ल देखके वोखर सराहना घलोक करिन। उत्पाद मन के सम्बंध म चर्चा करके वोखर महत्व अउ खूबी मन ल समझिन। हम आपला बता देवन के छत्तीसगढ़ हस्तशिल्प विकास बोर्ड कोति ले घरेलू अउ स्थानीय स्तर म बनइया समान अउ कला ल बढ़ावा देहे अउ बाजार उपलब्‍ध कराए बर समय समय म क्राफ्ट मेला के आयोजन करे जाथे। एखर से हस्त कला ल बढ़ावा मिले के संगेच ये क्षेत्र म लगे मनखे मन के रोजगार सुनिश्चित होथे। ये मौका म चर्चा के बेरा म मंत्री ह कहिन कि अइसन आयोजन ले हमार हस्तशिल्प के बढ़वार के बारे म मनखे मन ल जानकारी होथे। इंकर सुंदरता के बारे म मनखे जानथे अऊ कलाकार मन के सामान के बनेच बिक्री होथे।

आज मैं ह ये आयोजन देखेंव। दुर्ग-भिलाई के मनखे क्राफ्ट बाजार आहीं त ओ मन ल अपन रूचि के मुताबिक बहुत अकन वैरायटी मिलही। संगेच वोमन इहू देख पाहीं के हमर हस्तशिल्प कतेक आनी-बानी के हे। इहां आके मैं कारीगर मन ले घलोक मिलेंव। ऊंखर अपन काम के प्रति गहिर सरधा देखके मोला बहुत अच्छा लागथे। पुरखा मन ले सीखे हुनर ल ओ मन धरोहर के जइसे रखे हें अऊ ओ ल आगू बढ़ावत हें, ये बहुत अच्छा बात हे। भरोसा हे कि अवइया कुछेक दिन म इहां अड़बड़ मनखे आहीं अऊ क्राफ्ट मेला के आनंद लेंही। ये बेरा म दुर्ग शहर विधायक श्री अरूण वोरा हस्त शिल्प बोर्ड के अधिकारीगण उपस्थित रहिन। ये मौका म विधायक श्री अरुण वोरा ह कहिन कि इहां कारीगर मन ह नाना प्रकार के क्राफ्ट रखे हें। ये बहुत खूबसूरत हे अऊ मनखे मन ल पसंद आही। संगेच अवइया कुछ दिन म मनखे मन ल बने खरीदारी के अवसर घलोक मिलही।

लउछरहा..