सात साल के नान्हे क्रिएटर ह जीतिस सबके दिल

रायपुर, 25 फरवरी 2024। जनसंपर्क विभाग कोती ले आयोजित “कॉलेब करहू के” क्रिएटर मीटअप म, सोशल मीडिया अऊ यूट्यूब के कई ठन पेज अऊ चैनल के क्रिएटर्स मन ह भाग लीन। इही बीच एक नान्हे क्रियेटर विनीता घलोक ए मीटअप के हिस्सा बनिस।
क्रिएटर मीटअप म हर उमर के कलाकार मन ह भाग लीन जेमां सबले कम उमर के क्रिएटर रहिस सात साल के विनीता। अपन गजब के प्रतिभा के संग वो ह सबो के मन मोह लीस। मीटअप म विनीता ह ‘श्री राम आए हे..’ गीत म मनमोहक नृत्य प्रस्तुत करिस। ओखर प्रतिभा ह सबो ल आकर्षित करिस अऊ ऑडिटोरियम ताली के शोर ले गूंज उठिस। विनीता के प्रस्तुति देख के जनसंपर्क विभाग के आयुक्त श्री मयंक श्रीवास्तव ह वोखर प्रशंसा करिस अऊ विनीता ल प्रोत्साहित करिस। उमन कहिन, “विनीता के परफॉर्मेंस ह सबके मन ल मोह लेहे हे अऊ वोखर उपस्थिति ह ए मीटअप ल यादगार बना देहे हे।” उहां उपस्थित आन क्रिएटर्स मन घलोक वोखर प्रस्तुति के सराहना करिन।
विनीता ह यूट्यूब चैनल के माध्यम ले अपन पहिचान बनाय हे। वोखर प्रस्तुति ह एक पइत फेर ये सिद्ध कर दिस कि जब बात प्रतिभा के होथे त उमर के कोनो सीमा नइ होवय।