किसान कमल ह कुंआ खोदवा के चालू करिस सब्जी बाड़ी के काम: होवत हे बनेच कमई

गरियाबंद, 02 फरवरी 2021 महात्मा गांधी राष्ट्रीय ग्रामीण रोजगार गारण्टी योजना अंतर्गत जिला म चलत आजीविका संवर्धन ले कई परिवार के जिंदगी बदल गए हे। जीवन-यापन के साधन ल सशक्त करके मनखे मन के आर्थिक उन्नति के दुवार खोले हे। महात्मा गांधी नरेगा ले निर्मित संसाधन मन ह हितग्राही मन के आजीविका ल सुदृढ़ करे हे। नवा संसाधन मन ह ओ मन ल ये काबिल घलोक बना देहे हे कि अब उलट परिस्थिति मन म ओ मन दूसर मन के मदद करत हे। अइसनहे जिला के आखरी छोर म बसे देवभोग ब्लॉक के ग्राम झिरिपानी के सीमांत कृषक कमल ह कुंआ ले अपन जिंदगी के दिशा ल बदल देहे हे। अब ओ ह सालाना 60 ले 70 हजार रूपिया आय प्राप्त करत हे। मनरेगा योजना अंतर्गत कुंआ निर्माण पास होए के बाद कुंआ खोदवाए के प्रस्ताव पंचायत म रखे गीस। 1 लाख 65 हजार रूपिया प्रशासनिक स्वीकृति प्राप्त होए के बाद काम चालू करे गीस। 30 फीट गहराई अऊ 12 फीट चौड़ाई कुंआ खुदाई ले 380 मानव दिवस के रोजगार के सृजन होइस। ये प्रकार कुआ तियार होइस। कुंआ बने ले पहिली जमीन अनुपयोगी होए के सेती कोनो फसल अऊ सब्जी बाड़ी के काम संभव नइ रहिस फेर आज ओ जमीन म कुऑ बने के बाद किसान ह सब्जी बाडी के काम कुंआ के माध्यम ले सिंचाई करके करत हे। जेखर से किसान के आर्थिक स्थिति सुदृढ होए हे। किसान ह सब्जी-भाजी लगाना शुरू करिस। जेखर से वो ह अपन उपयोग के संग कुल आमदनी 30-40 हजार प्रति साल लाभ लेवत हे अऊ खरीफ फसल म 20-30 हजार तक के लाभ मिलत हे। ए प्रकार ले ये किसान के कुंआ बन जाए ले साल भर म करीबन 50-70 हजार तक के आमदनी होवत हे।
किसान के पैदावार ल देखते कृषि विभाग अऊ क्रेडा के माध्यम ले अनुदान म कुंआ म सोलर पैनल लगवाए गीस । जेखर से किसान ल सब्जी बाड़ी म सिंचाई करे म सुविधा होइस। किसान ह कुंआ के चारो कोति फलदार वृक्ष लगाए हे ताकि फल ल बेचके आमदानी कमा सकें। अभी अभी हाल म किसान ह अपन बाड़ी म टमाटर, तरोई ,लौकी ,मखना ,बरबटटी ,प्याज भाजी, सेमी, लहसुन, धनिया,भाटा लगाए हे। कुंआ के आसपास फलदार वृक्ष जइसे केला, पपीता, कटहल, मुनगा अऊ अमरूद पौधा घलोक लगाए गए हे। किसान के पैदावार अऊ प्रयास ल देखत जिला पंचायत के मुख्य कार्यपालन अधिकारी श्री चन्द्रकांत वर्मा ह घलोक निरीक्षण करके प्रशंसा करे हें। अब जिला सीईओ श्री वर्मा के निर्देश म जनपद पंचायत अऊ कृषि विभाग कोति ले नियमित तौर म कृषक ल प्रोत्साहित करत अउ नवा योजनाओं मन के बारे म जानकारी देहे जात हे।
किसान के सफलता ल देखते ग्राम पंचायत झिरिपानी म आन किसान मन ह प्रभावित होके कुऑ निर्माण करे के निर्णय लेहे हें अऊ ग्राम पंचायत म करीबन 30-35 किसान मन ह कुंआ निर्माण करवाए हें। ये प्रकार ग्राम पंचायत के किसान मन ल हर एक कुआ ले 30-40 प्रति हजार लाभ मिलत हे।