कसडोल, 30 अगस्त 2020। कसडोल म एक भारी चौंकाये वाला मामला आगु आये हे. नगर के श्मशान घाट म अंतिम संस्कार के बाद ले राख अउ हड्डी रहस्यमय तरीका ले गायब होगे. मुक्तिधाम के तिर म एसएलआरएम सेंटर म रहने वाला चौकीदार के कहना हे कि वो रात म सो गे रहिस, वोला कुछु मालूम नइ हे. मुक्तिधाम के चाबी रखने वाला ल घलो कुछ भी जानकारी नइ हे. परेशान परिजन ल घटना के जानकारी होवत पुलिस चौकी लवन म लिखित शिकायत दर्ज कराईस. आज घटनास्थल म तहसीलदार के आगू समक्ष परिजन ह अपन व्यथा बताईस.
जानकारी के अनुसार, कसडोल निवासी कमलेश श्रीवास पिता गया राम श्रीवास ह 26 अगस्त के फांसी लगाके आत्महत्या कर लिस, जेखर जानकारी होवत ही परिजन मन खोजबीन करके, कसडोल नगर के ही चंदली भाठा खार ले वोखर शव बरामद करिस. चूंकि कोरोना वायरस संक्रमण के चलत कसडोल थाना ल कंटेन्मेंट घोषित करके सील कर दे गे हे, येखर सेती लवन चौकी म घटना के शिकायत दर्ज कराये गिस अउ पुलिस ह तत्परता के संग काम करके तुरंत शव के पंचनामा कर परीक्षण बर भेजिस. देर शाम होय के सेती दूसरा दिन बिहनिया शव परीक्षण करे गिस, जेमा डॉक्टर ह फांसी लगाये के कारण दम घुटे ले मउत होना बताईस.
पोस्टमार्टम के बाद परिजन ह शव ल मुक्तिधाम हड़हापारा म रीति रिवाज के साथ अंत्येष्टि करिन. दूसर दिन यानी 28 अगस्त के जब परिजन मुक्तिधाम पहुंचिस, तब सब अस्थि सहित राख घलो मुक्तिधाम ले गायब मिलिस. येखर बाद परिजन ह नगर पंचायत अध्यक्ष प्रतिनिधि चन्दन साहू ल घटना के जानकारी दीस. तब अध्यक्ष प्रतिनिधि के नगर पंचायत के कर्मचारी मन ले पूछताछ करे गिस जेमा सबो झन घटना के संबंध म अनभिज्ञता जाहिर करिस. मुक्तिधाम के तिर म रहवइया एस एल आर एम सेन्टर म रहने वाला सोनू ह बताइस कि रात म वो सो गे रहिस वोला घटना के संबंध म कोनो जानकारी नइ हे. इही संबंध म मुक्तिधाम अउ एस एल आर एम सेन्टर के प्रभारी व्ही पी गहरवाल ले फोन म संपर्क करे के कोशिश करे गिस लेकिन वोमन अपन फोन उठाना घलो मुनासिब न समझिस.
तहसीलदार एस एल सिन्हा ह कहिस कि परिजन के सूचना मिले के बाद मउका म जाके देखेव त अस्थि अउ राख सबो गायब रहिस. इही संबंध म थानादार ल घटना के जांच कर आदेश दिये गिस. नगर पंचायत सी एम ओ अनुराधा एम ह कहिस कि स्वच्छता निरीक्षक व्ही पी गहरवाल ह बताइस कि मुक्तिधाम के बाउंड्रीवाल निर्माण के काम अभी अधूरा हे येखर वजह ले कोनो भी आ जा सकत हे अउ मामला पुलिस प्रशासन के हे वो हा जांच करय.
