नवा रायपुर म स्थापित होही अत्याधुनिक क्रिकेट एकेडमी

मंत्रिमण्डल ह दीस स्टेट क्रिकेट संघ ल 7.96 एकड़ जमीन
मुख्यमंत्री श्री साय के विशेष पहल म नियम मन ल शिथिल करके लेहे गीस निर्णय
रायपुर, मुख्यमंत्री श्री विष्णु देव साय के मंशा के मुताबिक राज्य के उभरत क्रिकेट खिलाड़ी मन के प्रशिक्षण अऊ विकास ल बढ़ावा देहे खातिर एक बड़का कदम उठाए गए हे। मुख्यमंत्री के अध्यक्षता म आज इहां मंत्रालय महानदी भवन म आयोजित कैबिनेट के बैठक म छत्तीसगढ़ स्टेट क्रिकेट संघ ल नवा रायपुर अटल नगर के सेक्टर-3, ग्राम-परसदा म 7.96 एकड़ जमीन क्रिकेट एकेडमी के स्थापना बर आबंटित करे के निर्णय लेहे गए हे। इहां ये उल्लेखनीय हे के सरकारी व्ययन नियम मन के तहत, गैर-लाभकारी संस्था मन ल सीधा जमीन आवंटन के प्रावधान नइ हे, फेर ए विशेष मामला म राज्य शासन ह नियम मन ल शिथिल करके ये निर्णय लेहे हे, जेखर से खिलाड़ी मन के हित म क्रिकेट एकेडमी के स्थापना हो सकही।
जानबा हे के छत्तीसगढ़ स्टेट क्रिकेट संघ ल 2016 म भारतीय क्रिकेट कंट्रोल बोर्ड (बीसीसीआई) ले पूर्णकालिक मान्यता प्राप्त हे। एखर बर नगर विकास प्राधिकरण ह कुल 7.96 एकड़ जमीन चिन्हित करे हे।
छत्तीसगढ़ राज्य म क्रिकेट के क्षेत्र म अपार संभावना हे। प्रदेश के कई खिलाड़ी राष्ट्रीय स्तर म अपन प्रतिभा दिखा डरे हें। नवा रायपुर म शहीद वीर नारायण सिंह अंतरराष्ट्रीय स्टेडियम मौजूद हे, फेर अंतरराष्ट्रीय स्तर के सुविधा मन अऊ प्रशिक्षण बर एकेडमी के जरूरत महसूस करे जात रहिस। ए निर्णय ले प्रदेश के प्रतिभाशाली युवा मन ल क्रिकेट म आगू बढ़े के बेहतरीन अवसर मिलही अऊ राज्य ल राष्ट्रीय-अंतरराष्ट्रीय स्तर म विशेष पहिचान मिलही। छत्तीसगढ़ सरकार के ये कदम नइ केवल प्रदेश के युवा क्रिकेटरों के बर अवसर के नवा दुवार खोलही, बल्कि छत्तीसगढ़ ल खेल के क्षेत्र म मजबूत पहिचान देवाए म सहायक होही।