रायपुर, पुलिस ह दावा करे हे कि प्रदेश म अब तक के गांजा जब्ती के सबले बड़े कार्रवाई करे गए हे। पुलिस ह 10 कुंटल 55 किलो मादक पदार्थ गांजा जेकर कीमत करीबन दू करोड़ ग्यारा लाख रूपिया आंके गए हे। एखर संग परिवहन म प्रयुक्त वाहन ट्रक कीमती बीस लाख रूपिया, दू स्मार्ट फोन कीमती दस हजार रूपिया समेत कुल जुमला कीमती दू करोड़ इकत्तीस लाख बारह हजार दू सौ रूपिया के गीस जप्ती बनाए गए हे।
पुलिस अधीक्षक धमतरी के हुकुम म सीमावर्ती थाना मन म सरलग अवैध शराब, गांजा, धान परिवहन अउ अवैध कारोबार उपर रोक लगाय बर नाकेबंदी करे जात हे। चेकिंग के बेरा म धमतरी पुलिस ह अंतरराज्यीय गांजा तस्कर मन उपर नकेल कसे बर सरलग कार्रवाई करत हे। पुलिस अधीक्षक प्रशांत ठाकुर ह कानून व्यवस्था अउ अपराध रोके बर बेरा-बेरा म जम्मो थाना/चौकी प्रभारी मन ल आसूचना तंत्र ल मजबूत करत संदिग्ध आचरण के मनखे मन उपर सरलग निगरानी रखे के हुकुम देहे हें। अति.पुलिस अधीक्षक निवेदिता पॉल अउ अनुविभागीय अधिकारी मयंक रणसिंह अउ उप पुलिस अधीक्षक नक्सल आरके मिश्रा के बताए मुताबिक थाना प्रभारी युगलकिशोर नाग के सियानी म नाकाबंदी पाईंट अउ जांच कार्रवाई करे जात हे। इही दौरान ओड़िशा कोति ले आत एक ट्रक नंबर RJ 06 GC 3522 ल थाना बोराई के आगू बैरियर नाका तीर संदेह के आधार म रोकके चेक करे गीस, जेमां दू मनखे बइठे मिलिस पूछताछ म गतिविधी संदिग्ध लगीस तब ओखर नाम पूछे म गोपाल गुर्जर पिता भैरूलाल गुर्जर उमर 22 साल जाति गुज्जर साकिन गडवाई ग्राम पंचायत बाजुन्दा थाना बदनोर जिला भीलवाडा राजस्थान अऊ प्रभु लाल गुर्जर पिता रामलाल गुर्जर उमर 22 साल साकिन हदवा कबाडियां थाना क्रेडा तहसील किडीमाल जिला भीलवाडा राजस्थान के होना बताइन। ट्रक के तलाशी लेहे म ट्रक के पीछू डाला म छोटे बड़े आकार के एशियन पेंट के डब्बा भरे दिखिस ऊपर म काला मटमैला रंग के तिरपाल ले ढके रहिस। ओखर भीतर सफेद रंग के 46 प्लास्टिक बोरी मन के भीतर खांकी रंग के टेप ले लपटाए छोटे बड़े आकार के पैकेट म मादक पदार्थ गांजा ल लुका के रखे गए रहिस। पूछताछ म आरोपी मन ह बताइस कि ओ मन विशाखापटनम (आन्ध्र प्रदेश ) ले एशियन पेंट लोड करके भीलवाडा राजस्थान बर निकले हें। रद्दा म सालुर घाटी तीर रोड ले 2 किलो मीटर अंदर जंगल म गांजा लोड करिन, गांजा लोडकरके राजस्थान जात रहिन। आरोपी मन के विरूद्ध धारा 20 ( ख ) नारकोटिक्स एक्ट के तहत वैधानिक कार्रवाई करे जात हे।
दू करोड़ के गांजा जब्त, दू आरोपी गिरफ्तार
