खंड अऊ अल्प बरसा के हालात म घलोक गिदला नाला तीर लहलहावत हे फसल

बलौदाबाजार, खंड अऊ अल्प बरसा के हालात म धान के फसल ल बचाय बर छत्तीसगढ़ सरकार के नरवा संवर्धन अऊ विकास योजना संजीवनी साबित होवत हे। बलौदाबाजार जिला के पलारी विकासखण्ड के गिदला नरवा म कुची गांव के तीर चेकडैम निर्माण ले 68 एकड़ खेत मन म सिंचाई होवत हे। उलट हालत म फसल मन ल समय म पानी मिल जाय ले अब हरी-भरी होके फसल लहलहावत हे। कृषि विभाग कोति ले ये नाला म पाछू दू साल म तीन चेकडैम बनाके जरूरत के मुताबिक पानी रोके जात हे। ये साल खंड वर्षा के हालात म रोके गए पानी किसान मन बर वरदान साबित होवत हे। चेकडैम ले न केवल कूची भलुक हरीनभठ्ठा, खपरी अऊ चमोरी ग्राम के करीबन 75 किसान मन के खेत मन ल पानी मिलत हे। कई ठन जगा मन म नरवा म पांच सिंचाई पंप स्थापित करके किसान मन पानी लिफ्ट कराके अपन खेत मन म पाइप के जरिये ले जाके सिंचाई करत हें।
सिंचाई सुविधा के लाभ उठावत किसान मन म शेषनारायण चन्द्रवंशी, आलोक चन्द्रवंशी, अभिषेक, संतुराम, खम्मन, राजेश साहू, गिरीश, मनोहर आदि किसान मन ह नरवा संवर्धन अऊ विकास योजना ल अड़बड़ उपयोगी अऊ लाभप्रद बताइए हें। उमन कहिन कि चेकडैम निर्माण नइ होए ले पूरा पानी बोहके गांव ले बाहिर चल देत रहिस। किसान संकट आए म आकाश कोति देखत रहि जात रहिस। नरवा ल बांधके चेकडैम बना देहे ले पानी इहां रूकत हे। किसान सिंचाई करके फसल बचाय म सफल होवत हें। धान के फसल कंसा अऊ गभोट अवस्था म हे अऊ लहलहावत हे। फसल के बढि़या हालत देखके किसान मन ल अड़बड़ संतोस मिलत हे। ग्राम के सरपंच रवि साहू के बताती पउर साल इही चेकडैम के पानी ले रबी के मौसम म घलोक करीबन 30 एकड़ म फसल लेहे गए रहिस।