जगदलपुर, 19 अक्टूबर 2020। एनएमडीसी म नौकरी लगाय के झांसा देके लोगन ले करोड़ों रुपिया के ठगी करे के मामला म कोतवाली पुलिस ह दु झन ठग मन ल गिरफ्तार करे हे। उहें ये मामला म संलिप्त फरार महिला के तलाश करे जावत हे।
सीएसपी हेमसागर सिदार ह मामला के जानकारी देत हुए बतइस कि प्रार्थी ह कोतवाली थाना म धोखाधड़ी के खिलाफ मामला दर्ज करवात हुए बताय रिहिस कि साल 2017 म एनएमडीसी म नौकरी लगाय के बात कही के बचेली निवासी नरेंद्र चौधरी (उम्र41) अउ संजय दयाल (उम्र50) ह ओखर ले 8 लाख रुपिया ले रिहिस। एखर संग म अउ लोगन मन ले करीबन 42 लाख 50 हजार रुपिया के ठगी करे रिहिस।
पुलिस ह मामला दर्ज करके सोमवार के दुनों आरोपी ल गिरफ्तार करके उखर कब्जा ले 7 लाख रुपिया ले ज्यादा नगद रकम के संग एक स्कार्पियो वाहन जब्त करे हे। मामला म शहर के एक महिला समेत अउ आरोपी शामिल हे, जेखर पता करे जावत हे। ये ठग मन ह प्रदेश के सैकड़ों लोगन मन ले 3 करोड़ रुपिया ले ज्यादा के ठगी करे हे।
