रायपुर, मुख्यमंत्री श्री भूपेश बघेल काली संझा चंदखुरी म छत्तीसगढ़ टूरिज्म बोर्ड अऊ संस्कृति विभाग कोति ले आयोजित सांस्कृतिक संध्या कार्यक्रम म पहुंचिन। कौशल्या माता अऊ प्रभु राम ले जुड़े प्रसंग मन ल मानस मंडली के कलाकार मन के प्रस्तुति ह श्रद्धालु मन ल भक्ति-भाव ले विभोर कर दीस।
कौशल्या माता मंदिर परिसर म 9 अकटूबर तक सांस्कृतिक संध्या कार्यक्रम आयोजित करे जाही। आज भिलाई के स्वामी महिला मानस मंडली, राजनांदगांव के एकता मानस परिवार, भाटापारा के सुंदरकांड समिति अऊ रिसामा के श्री रामलीला मंडली के दल के कलाकार मन ह कार्यक्रम प्रस्तुत करिन। मुख्यमंत्री श्री बघेल ह सांस्कृतिक कार्यक्रम प्रस्तुत करत कलाकार मन ले घुल-मिलकर बात करिन अऊ उंखर प्रस्तुति ल सहराईन। मुख्यमंत्री के संग कलाकार मन ह अपन फोटो तको खिंचवाईन।
कार्यक्रम के अध्यक्षता करत गृह अऊ पर्यटन मंत्री श्री ताम्रध्वज साहू ह कहिन कि छत्तीसगढ़ सरकार राज्य के संस्कृति ल बढ़ावा देहे बर सरलग उदीम करत हे। उमन कहिन कि चंदखुरी अब राज्य के प्रमुख पर्यटन स्थल के रूप म जाने जाही।
गौ सेवा आयोग के अध्यक्ष राजेश्री महंत श्री रामसुंदर दास ह कहिन कि मुख्यमंत्री श्री बघेल ह शारदीय नवरात्र के पहिली दिन म चंदखुरी म विकास कार्य मन के लोकार्पण करे हें। उमन कहिन कि चंदखुरी म स्थित माता कौशल्या के ये मंदिर अपन आप म पूरा विश्व म एकमात्र अइसे मंदिर हे, जिहां माता ह प्रभु श्री राम ल गोदी म लेहे हे। महंत श्री दास ह कहिन जीवन के अनसुलझे पहलु मन ल सुलझाए बर रामचरितमानस के चौपाई मन हमला रद्दा देखाथे।
ये बेरा म संस्कृति मंत्री श्री अमरजीत भगत, छत्तीसगढ़ पर्यटन मंडल के अध्यक्ष श्री अटल श्रीवास्तव, संस्कृति विभाग के सचिव श्री अलबंगन पी., छत्तीसगढ़ पर्यटन मंडल के प्रबंध संचालक श्री यशवंत कुमार, कलेक्टर श्री सौरभ कुमार, संस्कृति विभाग के संचालक श्री विवेक आचार्य, जनप्रतिनिधिगण, कई ठन विभाग मन के अधिकारी कर्मचारी अऊ बड़ संख्या म श्रद्धालु उपस्थित रहिन।
चंदखुरी के सांस्कृतिक संध्या म सामिल होइन मुख्यमंत्री
