मुंगेली, स्वामी विवेकानंद जी के जयंती के बेरा म राज्य स्तरीय युवा महोत्सव के रंगारंग अऊ मनमोहक आयोजन राजधानी रायपुर म 12 जनवरी ले चालू होवत हे। 12 जनवरी ले चालू होवइया राज्य स्तरीय युवा महोत्सव म मुंगेली जिला के 193 युवा मन छत्तीसगढ़ के संस्कृति ले युवा महोत्सव के मंच सजाहीं। ये राज्य स्तरीय युवा महोत्सव म जिला ले, छत्तीसगढ़ के पारंपरिक लोकनृत्य मन म 15 साल ले 40 साल आयु समूह के महिला अउ पुरूष भाग लेहीं। एमां श्री सूरज यादव अउ ऊंखर साथी, लोकनृत्य म ही 40 साल ले जादा आयु समूह के श्री मोतीराम अउ ऊंखर साथी अपन प्रतिभा के प्रदर्शन करहीं। लोकनृत्य पंथी म श्री लक्ष्मीकांत जटेजा अउ ऊंखर साथी मन आकर्षक पंथी नृत्य के प्रस्तुति देहीं।
छत्तीसगढ़ के धरा म बसे लोकनृत्य नृत्य सुआ म श्रीमती शिवकुमारी अउ ऊंखर साथी मन सुआ नृत्य के इंद्रधनुषी छंटा बगराहीं। श्री राजेंद्र कुमार अउ ऊंखर साथी छत्तीसगढ़ के पारंपरिक कर्मा नृत्य के प्रस्तुति देहीं। राउत नाचा म कु. आरती यादव अउ ऊंखर साथी मन राउत नाचा के परिधान म दोहा के माध्यम ले दर्शक मन ल अपन कोति आकर्षित करहीं। 15 साल ले 40 साल आयु वर्ग लोकगीत म श्री सूर्यकांत कुर्रे के नेतृत्व म अऊ 40 साल ले जादा आयु वर्ग के कलाकार सुशीला ध्रुव के नेतृत्व म अपन रंगारंग प्रस्तुति देंहीं। एकांकी नाटक प्रतियोगिता म श्री अजय कुमार राजपूत, शास्त्रीय गायन हिन्दुस्तानी म श्री हरनारायण वस्त्रकार अऊ श्री हीरालाल पटेल, सितार वादन म श्री हिमांशु मिश्रा अऊ श्री गोविंद मक्कड़ अऊ बासुरी वादन म श्री कमलेश यादव, तबला वादन म श्री गोविंद मक्कड़, हारमोनियम वादन म हरलीन कौर मक्कड़ व भोजराज आचार्य, कु. पूजा ठाकुर, श्री दीपक राज, गिटार वादन म श्री रवि देवांगन, कत्थक नृत्य म सुश्री डिंकी केशरवानी, वव्तृव्य कला म श्री सूरज यादव अपन कला के प्रदर्शन करहीं।
