गरियाबंद,23 मार्च 2020। गरियाबंद के मैनपुर स्थित ग्राम सर्गिगुड़ा म चार घर मन म आगी लग गए हे. ओड़िशा ले पहुंचे फायर ब्रिगेड ह आगी म काबू पाइस. आगी ले कोनो भी तरह के जनहानि नई होय हे लेकिन बड़े मात्रा म लोग मन के नुकसान होय हे.
घटना सोमवार बिहनिया के हे. ग्राम सर्गिगुड़ा म रहने वाला किराना व्यवसाई कैलाश कश्यप के घर म रसोई गैस सिलेंडर फटे ले आगी लग गे. किराना व्यवसाई के घर म पेट्रोल घलो रखाये रहिस. जेखर वजह ले आगी ह अउ विकराल रुप ले लिस. घर ले लगे ऊंखर किराना दुकान के संग ही अड़ोस-पड़ोस के घर ल घलो आगी ह अपन चपेट म ले लिस. आगी ले किराना व्यवसाई के घर के सबो सामान जलगे, संग ही घर म रखे 2 लाख रुपिया घलो आगी म जलके राख होगे.
आगी ल फैलत देखत ग्रामीण मन ह एखर सूचना प्रशासन ल दिस, फायर ब्रिगेड के कार्यालय 110 किलोमीटर दूर होय के कारण ले ओडिशा के चंदाहांडी ले फायर ब्रिगेड ल बुलाये गिस. फायर ब्रिगेड जब तक पहुंचतिस तब तक आगी ह चार घर मन ल अपन चपेट म ले लिस. जेखर बाद मौका म पहुंचे ओडिशा के दमकल कर्मी मन ह आगी म काबू पा लिस.
