भिलाई म बम के जइसे फटिस सिलेंडर, दुकान म लगिस आगी, भाग के लोगन मन बचाइस अपन जान

भिलाई, 25 जुलाई 2020। भिलाई के सुपेला म एक दुकान म सिलेन्डर फटे ले भीषण आगी लग गए। ये आगजनी म दुकान म रखे सबो माल कुछ ही देर म जल के पूरा तरह ले खाक होगे। उहें घटना के खबर मिलत ही मउका म दू दमकल के गाड़ी अउ पुलिस के टीम पहुंचिस जोन कड़ा मशक्कत के बाद आगी म काबू पा लिस। घटना आज बिहनिया भिलाई के सुपेला लक्ष्मी मार्केट के हे। इहां एक गैस चुल्हा रिपेयर के दुकान म अचानक शार्ट सर्किट होइस। शार्ट सर्किट के सेती ले दूकान म आगी लग गए अउ धुआं निकले लगिस जेखर सूचना आसपास के लोगन मन ह दमकल विभाग ल दिस। मउका म दमकल के दू गाड़ी समेत सुपेला पुलिस के टीम पहुंचिस अउ आगी बुझाये के काम म जुटगे। इही बीच दुकान म रखे एक सिलेंडर फटगे अउ देखते ही देखत दुकान म भीषण आगी लग गए। सिलेंडर के फटे के आवाज अतना जोरदार रिहिस कि उहां खड़े लोगन मन म अफरा तफरी मचगे रिहिस। कुछ घंटा के मशक्कत के बाद दमकल विभाग के कर्मचारी मन ह आगी उपर पूरा तरह ले काबू पाइस, जेखर बाद आसपास के लोगन मन ह राहत के सांस लिस। हालांकि अच्छा बात ये रिहिस कि ये घटना म कोई हताहत नइ होय हे। फिलहाल आगजनी म दुकानदार के नुकसान के पता नइ चल पाये हे।