रायपुर, 4 जुलाई 2021 । मनरेगा ले खेत म डबरी खोदई के बाद कोरिया के मनेन्द्रगढ़ विकासखण्ड के डंगौरा म रहइया गोपाल अब रोजगार के चिंता ले मुक्त हो गे हे। खुद के सिंचाई के साधन विकसित हो जाय ले वोखर कई समस्या के एके संग निदान हो गीस। पहिली सिंचाई के सुविधा नइ होए ले ओ ल अपन दू एकड़ खेत बर पाइप लगाके दूरिहा नदी ले पानी लात रहिस। ये मा अड़बड़ बेरा अऊ मेहनत लगत रहिस। असामाजिक तत्व मन कभू पाइप या तार ल काट देवंय जेकर से आर्थिक नुकसान घलोक झेलना परत रहिस। डबरी बन जाय ले ए परेशानी मन ले मुक्ति मिल गीस। अब गोपाल के खेत मन म बहुत हरियाली हे। साग-भाजी बेचके ओ ह अपन परिवार के जरूरत ल आसानी ले पूरा करत हे। ये साल अप्रैल-मई म लॉक-डाउन के समय वो ह हर हफ्ता तीन ले चार हजार रूपिया के सब्जी बेचे हे। अब बारिश के मौसम के खेती ले घलोक ओ ल हर हफ्ता दू ले ढाई हजार रूपिया के लाभ मिलना शुरू हो गए हे।
ग्राम पंचायत डंगौरा के अनुसूचित जनजाति वर्ग के किसान गोपाल के परिवार म पत्नी अऊ चार लइका हे। गांव म एक दूसर किसान के डबरी के सफलता ले प्रभावित होके वो ह घलोक मनरेगा ले डबरी निर्माण बर आवेदन देहे रहिस। पंचायत ह मार्च-2021 म गोपाल के खेत म डबरी खोदई बर एक लाख 94 हजार रूपिया स्वीकृत करे गए रहिस। अपरेल म काम शुरू होइस अऊ पांच हफ्ता बाद मई म डबरी के निर्माण पूर्ण घलोक हो गीस। गोपाल अऊ वोखर पत्नी कैलासिया बाई ल ये काम म मजदूरी के रूप म दस हजार रूपिया घलोक मिलिस।
मनरेगा ले बने डबरी ले मिलीस सिंचाई के साधन, सब्जी के खेती ले गोपाल ह बढ़ाईस अपन आमदनी
