कोंडागांव / मनरेगा (MGNREGA) योजना ह अब गाँव वाले मन के तकदीर बदलत हे। कोंडागांव जिला म ‘डबरी निर्माण’ ले किसान अउ मजदूर मन ल सीधा फायदा मिलत हे। सरकार ह अब हर गाँव म पानी रोके अउ कमाई बढ़ाए बर कमर कस लेहे हे।
का-का होही फायदा?
डबरी बने ले खेत म साल भर पानी रहिही। एखर से किसान भाई मन अब सिरिफ धान नहीं, भलुक साग-भाजी, मछली पालन अउ बतख पालन करके डबल कमाई कर सकहीं। डबरी खनाय के टेम म मनरेगा म रोजगार घलो मिलही अउ बाद म पानी के सुविधा घलो।
हर पंचायत म 5 ले 10 डबरी:
जिला पंचायत CEO श्री अविनाश भोई ह बताइन के ए साल अब तक 384 डबरी ल मंजूरी मिल गे हे। लक्ष्य ये हे के हर ग्राम पंचायत म मांग के हिसाब ले 5 ले 10 डबरी बनाय जाय। फेर, डबरी उहें बनही जिहाँ के माटी पानी रोके बर सही होही, एखर बर पहिली जमीन के जाँच करे जाही।
‘मोर गाँव-मोर पानी’ अभियान:
ए पहल ले “मोर गाँव-मोर पानी” अभियान ल मजबूती मिलत हे। अगर आप मन ल भी अपन खेत म डबरी बनवाना हे, त ग्राम पंचायत म प्रस्ताव दे सकत हव।
