- सार्वजनिक उपक्रम मन म स्थानीय युवा मन ल भर्ती करे जाय म मुख्यमंत्री ह दीन जोर
- नगरीय निकाय मन ल विकास कार्य बर साढ़े चार करोड़ रूपिया के घोषणा
- छत्तीसगढ़ डड़सेना (सिन्हा) कलार समाज के सम्मेलन
रायपुर, मुख्यमंत्री श्री भूपेश बघेल ह आज बेमेतरा जिला के ग्राम बावामोहतरा पहुंचके छत्तीसगढ़ डड़सेना (सिन्हा) कलार समाज के महासभा म शिरकत करिन। उमन कहिन कि राज्य गठन के 18 साल बाद पहली पइत छत्तीसगढ़ के पारम्परिक तीज-तिहार म अवकाश घोषित करे गए हे। एमां हरेली पर्व, तीजा, अऊ माता कर्मा जंयती के अलावा विश्व आदिवासी दिवस ( 9 अगस्त) सामिल हे।
मुख्यमंत्री ह ये बेरा म जिला के 20 करोड़ 34 लाख रूपिया के कई ठन निर्माण कार्य मन के लोकार्पण अऊ भूमिपूजन करिन। एखर अलावा हितग्राही मूलक योजना के अंतर्गत नागरिक मन ल 2 करोड़ 21 लाख रूपिया के सामान के वितरण घलोक करिन। उमन नगर पालिका परिषद बेमेतरा म विकास कार्य मन बर एक करोड़ रूपिया अऊ जिला के सबो नगर पंचायत- साजा, थानखम्हरिया, परपोड़ी, देवकर, नवागढ़, बेरला अऊ मारो म 50-50 लाख रूपिया देहे के घोषणा करिन। उमन ग्राम बावामोहतरा म डड़सेना समाज के भवन निर्माण बर घोषणा करिन। अइसनहे ये घलोक कहिन कि अवइया फरवरी महिना के बजट म मिनी स्टेडियम निर्माण के काम घलव सामिल करे जाही।
मुख्यमंत्री ह प्रदेश के सार्वजनिक उपक्रम मन म स्थानीय युवा मन ल भर्ती करे जाय म जोर दीन। उमन एखर बर स्टील अथॉरिटी ऑफ इडिया लिमिटेड (सेल) राष्ट्रीय खनिज विकास निगम (एन.एम.डी.सी) राष्ट्रीय ताप विद्युत निगम, (एन.टी.पी.सी) के अध्यक्ष मन ले भर्ती के कार्यवाही हैदराबाद, नागपुर, भोपाल के बदला मा दन्तेवाड़ा, जगदलपुर, रायपुर, अऊ दुर्ग ले करे के वकालत करिन। उमन कहिन कि एन.टी.पी.सी. के अंतर्गत रायगढ़ जिला के ग्राम लारा म स्थापित होवइया राष्ट्रीय ताप विद्युत गृह म जऊन किसान मन के जमीन अधिग्रहित करे गए हे उन परिवार वाले मन ल सर्वप्रथम नौकरी दीए जाना चाही।