- महिला चिकित्सक मन महिला मन के करहीं इलाज, देश म अपन जइसे अनूठी योजना
- मुख्यमंत्री शहरी स्लम स्वास्थ्य योजना के तहत पायलेट प्रोजेक्ट के रूप म रायपुर, दुर्ग-भिलाई अऊ बिलासपुर निगम क्षेत्र म होही संचालन
रायपुर, 19 नवम्बर 2020। मुख्यमंत्री श्री भूपेश बघेल ह आज पूर्व प्रधानमंत्री स्वर्गीय श्रीमती इंदिरा गांधी के जन्म दिवस म महिला मन बर क्लीनिक दाई-दीदी क्लीनिक के शुभारंभ करिन। मुख्यमंत्री ह पायलेट प्रोजेक्ट के रूप म रायपुर, दुर्ग-भिलाई अऊ बिलासपुर नगर निगम क्षेत्र बर 03 स्पेशल मोबाइल दाई-दीदी क्लीनिक ल अपन निवास ले हरियर झण्डी देखा के रवाना करिन। मुख्यमंत्री ह मोबाइल क्लीनिक के भीतर उपलब्ध सुविधा मन के अवलोकन घलोक करिन अऊ अपन ब्लड प्रेशर के जांच घलोक कराइन। ये दाई-दीदी स्पेशल क्लीनिक म डॉक्टर संग पूरा चिकित्सकीय स्टाफ महिला ही हें अऊ एमा केवल महिला मन के ही निःशुल्क इलाज करे जाही।
ये मौका म मुख्यमंत्री श्री भूपेश बघेल ह कहिन के दाई-दीदी क्लीनिक देश म अपन जइसे पहिली क्लीनिक ये, जऊन केवल महिला मन के इलाज करही। अभी हाल म एला रायपुर, दुर्ग-भिलाई अऊ बिलासपुर निगम क्षेत्र म मुख्यमंत्री शहरी स्लम स्वास्थ्य योजना के अंतर्गत पायलेट प्रोजेक्ट के रूप म शुरू करे गए हे अऊ आगू एकर विस्तार करे जाही। मुख्यमंत्री ह कहिन के संकोच के सेती महिला मन अपन बीमारी ल खुलके नइ बता पावयं। ये कारण उंखर बीमारी के सही उपचार नइ हो पावय। अब दाई-दीदी क्लीनिक म महिला चिकित्सक अऊ महिला स्टाफ होए ले ओ मन निःसंकोच अपन समुचित इलाज करा सकहीं। ये मां महिला मन ल निःशुल्क इलाज के सुविधा मिलही। ओ मन ल अस्पताल जाय के जरूरत नइ परय। मुख्यमंत्री ह महिला मन ले ये क्लीनिक के जादा ले जादा लाभ उठाए के अपील करे हें।
ये मौका म नगरीय प्रशासन मंत्री डॉ. शिव डहरिया, राज्य गृह निर्माण मण्डल के अध्यक्ष श्री कुलदीप जुनेजा, राज्य महिला आयोग के अध्यक्ष श्रीमती किरणमयी नायक, महापौर श्री एजाज ढेबर, सभापति श्री प्रमोद दुबे, रायपुर विकास प्राधिकरण के अध्यक्ष श्री सुभाष धुप्पड़, सचिव नगरीय प्रशासन श्रीमती अलरमेल मंगई डी., रायपुर कलेक्टर श्री भारतीदासन, नगर निगम कमिश्नर रायपुर, डॉक्टर, नर्स संग उपस्थित रहिन।
