रायपुर 26 मई 2024। लोकसभा आम निर्वाचन-2024 के अंतर्गत मतगणना 4 जून 2024 के होही। मतगणना के समय ईवीएम म दर्ज वोट के संग डाक मतपत्र के घलोक गणना करे जाही। डाक मतपत्र मन के गणना 11 संसदीय निर्वाचन क्षेत्र मन के संबंधित रिटर्निंग अधिकारी के मुख्यालय जिला मन म ही पूरा होही। एखर बर सबो संसदीय निर्वाचन क्षेत्र मन म आन संबंधित जिला मन ले डाक मतपत्र मन के परिवहन रिटर्निंग अधिकारी के मुख्यालय जिला मन म पूरा कर ले गए हे।
छत्तीसगढ़ के मुख्य निर्वाचन पदाधिकारी श्रीमती रीना बाबासाहेब कंगाले ह बताइस कि प्रदेश म 25 मई के स्थिति म कुल 41 हजार 877 डाक मतपत्र मिले हे। एमां निर्वाचन ड्यूटी म तैनात कर्मचारी-अधिकारी मन के सुविधा केन्द्र ले मिले कुल 26 हजार 936 डाक मतपत्र, होम वोटिंग के अंतर्गत 85 साल ले जादा आयु वर्ग के मतदाता मन ले मिले कुल 2 हजार 761 अऊ दिव्यांगजन के कुल 1 हजार 453 डाक मतपत्र अउ अनिवार्य सेवा श्रेणी के 779 डाक मतपत्र घलोक सामिल हे। एकरे संग सेवा मतदाता मन ल जारी करे ईटीपीबी डाक के माध्यम ले हर एक दिन मिलत हे अऊ 25 मई के स्थिति म कुल 9 हजार 948 ईटीपीबी मिले हे। डाक विभाग के माध्यम ले ईटीपीबी के प्राप्ति मतगणना दिवस 4 जून के मतगणना प्रारम्भ होए के पहिली तक करे जाही। एखर बर मतगणना स्थल म डाक विभाग के प्रतिनिधि कोती ले बिहनिया 8 बजे के पहिली तक मिले सबो ईटीपीबी डिलीवर करे जाही। मतगणना स्थल म प्रवेश बर डाक विभाग के प्रतिनिधि ल आईडी कार्ड/पास जारी करे जाही।
मुख्य निर्वाचन पदाधिकारी श्रीमती कंगाले ह बताइस कि डाक मतपत्र मन के गणना 11 रिटर्निंग अधिकारी मन के मुख्यालय जिला मन म 4 जून के बिहनिया 8 बजे ले चालू हो जाही। एखर बर जरूरी व्यवस्था अउ तैयारी पूरा कर लेहे गए हे। डाक मतपत्र ल जिला मुख्यालय मन म ट्रेज़री स्थित स्ट्रांग-रूम म सुरक्षा व्यवस्था के संग रखे गए हे। मतगणना दिवस ल ए मतपेटी के परिवहन बिहनिया 6 बजे निर्वाचन लड़इया अभ्यर्थि/उनकर प्रतिनिधि मन के उपस्थिति म सम्पूर्ण सुरक्षा के संग काउंटिंग सेण्टर म करे जाही। ए 11 जिला मन म डाक मतपत्र मन के मतगणना 8 बजे चालू होए के आधा घंटा बाद मने साढ़े 8 बजे ले ईवीएम के मत के गणना चालू करे जाही। ए 11 मुख्यालय जिला मन ल छोड़के बांचे 22 जिला मन म 8 बजे ले ही ईवीएम म दर्ज मत के गणना चालू कर दे जाही।
11 संसदीय क्षेत्र मन के रिटर्निंग अधिकारी मन के मुख्यालय जिला मन म डाक मतपत्र के गणना बर अलग ले काउंटिंग हॉल तैयार करे गए हे, जेमां एक टेबल म 500 डाक मतपत्र के गणना करे जाही। काउंटिंग बर हर एक टेबल बर एक-एक अकतहा सहायक रिटर्निंग अधिकारी घलोक अधिसूचित करे गए हे। डाक मतपत्र के गणना बर हर एक टेबल म एक एएआरओ के संग एक मतगणना पर्यवेक्षक, दू मतगणना सहायक अउ एक माइक्रो आब्जर्वर के घलोक नियुक्ति करे जाही।
भारत निर्वाचन आयोग के निर्देश के मुताबिक प्राप्त डाक मतपत्र के जानकारी हर एक दिवस सबो निर्वाचन लड़इया अभ्यर्थि मन ल जिला स्तर म प्रदान करे जात हे। लोकसभा आम निर्वाचन म पहिली चरण के मतदान अंतर्गत बस्तर लोकसभा क्षेत्र म कई श्रेणी के मतदाता मन ले कुल 3 हजार 264 डाक मतपत्र प्राप्त होए हे। उहें दूसर चरण के मतदान अंतर्गत राजनांदगांव, महासमुंद अऊ कांकेर लोकसभा क्षेत्र मन ले क्रमशः 1 हजार 568, 4 हजार 242 अऊ 6 हजार 326 डाक मतपत्र अब तक मील हे। प्रदेश म तीसर चरण म मतदान अंतर्गत सरगुजा लोकसभा क्षेत्र ले 2 हजार 440 डाक मतपत्र, रायगढ़ ले 3 हजार 585, जांजगीर-चांपा ले 5 हजार 682, कोरबा ले 2 हजार 789, बिलासपुर ले 3 हजार 607, दुर्ग ले 3 हजार 525 अऊ रायपुर लोकसभा क्षेत्र ले 4 हजार 849 डाक मतपत्र मिले हे।
