- सबो सामाजिक संगठन संवैधानिक प्रावधान मन ले मनखे मन ल करावव अवगत
- शहीद वीर नारायण सिंह जयंती बर करे गीस आमंत्रित
रायपुर, राज्यपाल सुश्री अनुसुईया उइके ह सर्व आदिवासी समाज के मनखे मन ले कहिन कि ओ मन समाज हित म दलगत भावना ले ऊपर उठके एकजुटता ले काम करव। संगेच सबो सामाजिक संगठन के पदाधिकारी आदिवासी मन ल संविधान म देहे गे अधिकार अऊ करे गए कई ठन प्रावधान मन ले आदिवासी समाज के मनखे मन ल अवगत करावव। राज्यपाल ह ये बात आज इहां राजभवन म कांकेर विधायक श्री शिशुपाल सोरी के नेतृत्व म उंखर ले मिले आए सर्व आदिवासी समाज के मनखे मन ले कहिन। ये बेरा म अंतागढ़ के विधायक श्री अनूप नाग विशेष रूप ले उपस्थित रहिन। ये मौका म प्रतिनिधिमण्डल ह राज्यपाल ल 09 दिसंबर के कांकेर जिला के राजाराव पठार म आयोजित शहीद वीर नारायण सिंह के जयंती म सामिल होए बर आमंत्रित करिन।
राज्यपाल सुश्री उइके ह कहिन कि ये खुशी के बात हे कि आदिवासी समाज के मनखे मिले बर राजभवन आत रहिथें। ये उंखर जागरूकता के चिनहा हे। उमन सामाजिक संगठन मन ले कहिन कि आप मन मनखे मन ल शिक्षित करके जागरूक होए बर प्रेरित करव, ताकि आदिवासी समाज आन मनखे मन के जइसे आगू बढ़ सकय। राज्यपाल ह कहिन कि संविधान म करे गए प्रावधान जइसे पांचवी अनुसूची, पेशा कानून अऊ अनुसूचित जाति अऊ जनजाति अत्याचार निवारण अधिनियम संग कई ठन प्रावधान मन ले समाज के मनखे मन ल अवगत करावव। उमन ए प्रावधान मन के जानकारी देहे बर अधिकारी मन अऊ समाज के प्रमुख मन बर प्रशिक्षण आयोजित करे के जरूरत व्यक्त करिन। राज्यपाल ह आदिवासी जनप्रतिनिधि मन ले अपेक्षा करे हें कि ओ मन समाजहित के बात मन ल विधानसभा म उठावंय, ताकि ओखर निराकरण हो सकय।
ये बेरा म छत्तीसगढ़ के कई ठन जिला मन ले आए सर्व आदिवासी समाज के पदाधिकारि मन ह कई ठन समस्या मन के तरफ राज्यपाल के ध्यान आकृष्ट करिस। कांकेर के विधायक श्री सोरी ह सर्व आदिवासी समाज के समस्या मन ल गंभीरता ले सुने बर राज्यपाल के आभार व्यक्त करिस।
