तुड़पारास, भोगाम, भैरमबंद ग्रामों के दीदी मन ल दे गीस प्रशिक्षण
रायपुर, 13 अगस्त 2024/ फूल के उपयोग अपन घर, मंदिर, शादी अउ सजावट के संग आन काम मन बर करे जाथे। फूल श्रद्धा अऊ भावना के चिन्हारी ये। अपन घर के कोला बारी, गार्डन, गमला मन म घलोक अलग-अलग फूल हमन लगाथन। बिहनिया-बिहनिया सुंदर अऊ सुगंधित फूल देखके मन आनंदित हो जाथे। इही पाय के जंगल कोती के महिला मन ल फूल के खेती खातिर प्रेरित करे अऊ रोजगार के अवसर देवाए बर उद्यान विभाग ह निःशुल्क पौधा देवत हे। दंतेवाड़ा जिला के स्व-सहायता समूह के 45 दीदी मन मिलके लगभग 4 एकड़ खेत म फूल के खेती करके आगू बढ़त हें।
जिला प्रशासन अऊ बिहान योजना अंतर्गत जिला के महिला स्व सहायता समूह के दीदी मन ल फूल के खेती करे बर उद्यान विभाग ह प्रशिक्षण घलो देहे हे। ये प्रशिक्षण जिला दंतेवाड़ा के गाँव तुड़पारास, भोगाम, भैरमबंद म दीदी मन ल दे गीस। फूल उत्पादन के बाद महिला समूह मन से फूल के माला अउ गुलदसता बनवा के माँ दंतेश्वरी मंदिर दंतेवाड़ा के प्रांगण म बेंचे जाही, ताकि ओ मन मुनाफा कमा के अकतहा आय अर्जित कर सकय। दंतेवाड़ा के उद्यानिकी विभाग अऊ सीएसआईआर राष्ट्रीय वनस्पति अनुसंधान संस्थान लखनऊ के डायरेक्टर अजीत शासनी के मार्गदर्शन म महिला समूह के दीदी मन ल कई प्रकार के फूल के 60 हजार पौधा वितरण करे गए हे।