मिर्चा के खेती ले जयपाल बनिस लखपति

दंतेवाड़ा, 19 दिसम्बर 2020। दंतेवाड़ा के एक छोटे कन गांव टेकनार के रहइया जयपाल नाग एक प्रगतिशील किसान हे। 3-4 साल पहिली वो ह परंपरागत रीति ले कृषि काम करत रहिस। जेखर से वोखर आर्थिक स्थिति वोतका अच्छा नइ रहिस। उद्यानिकी विभाग के कर्मचारी मन के मार्गदर्शन म वो ह परंपरागत कृषि ल छोड़के आधुनिक उन्नत पद्धति ले उद्यानिकी फसल लगाय ल चालू करिस। सबले पहिली उद्यान विभाग के राज्य पोषित योजना अंतर्गत 6 किसान मन के समूह म सामुदायिक स्पेसिंग 4 हेक्टेयर म चैन कड़ी फेंसिंग कराय गीस। एकर पाछू राष्ट्रीय कृषि विकास योजना ले केला प्रदर्शन अऊ क्षेत्र विस्तार चालू करे गीस, जेखर से अच्छा आमदनी होए लगिस अउ ए ह इंकर जीवन शैली ल बदल दीस। उमन उद्यानिकी फसल ले दोपहिया अऊ ट्रैक्टर बिसा लीन जेखर से कृषि काम म सुविधा होए लगिस। साल 2020-21 म फसल बदलाव करके 6 एकड़ म मिरचा के खेती करत हें पहिली चक्र फसल तुड़ाई म 5 हजार किलोग्राम मिरचा मिलिस जऊन ल 80 रूपिया प्रति किलो के दर ले बिक्री करके 4 लाख रूपिया अर्जित करिस। आगू फसल ले अऊ 2 लाख 50 हजार ले 3 लाख आमदनी होए के संभावना हे। जयपाल नाग एक आदर्श किसान हे जेखर से कई किसान मार्गदर्शन अऊ सलाह लेत रहिथें। वो ह रोजेच 6-7 मजदूर ल रोजगार घलोक मुहैया करावत हे। शासन के महत्वकांक्षी योजना बाड़ी विकास अंतर्गत फलदार पौधा अऊ पत्तेदार सब्जि के तको वो ह रोपण करे हे। जेखर से वोला अकतहा आमदनी घलोक मिलत हे। आत्मा योजनाअंतर्गत जिला स्तरीय उद्यानिकी कृषक के पुरस्कार घलोक वोला मिले हे। श्री जयपाल नाग जिला के उन्नत तकनीक ले उद्यानिकी फसल उत्पादन के प्रेरणा स्रोत हे।